भारताचा महान फुटबॉलपटू आणि राष्ट्रीय संघाचा कर्णधार सुनील छेत्रीने आंतरराष्ट्रीय फुटबॉलमधून निवृत्तीची घोषणा केली आहे. आंतरराष्ट्रीय फुटबॉलमध्ये सर्वाधिक गोल करणाऱ्या खेळाडूंपैकी एक असलेल्या भारताचा अनुभवी कर्णधार छेत्री याने गुरुवारी 16 मे रोजी सकाळी व्हिडिओ स्टेटमेंटमध्ये याची घोषणा करून आपल्या लाखो चाहत्यांना मोठा धक्का दिला. दीड दशकांहून अधिक काळ भारतीय संघाचे प्रतिनिधित्व करणाऱ्या 39 वर्षीय सुनीलने सांगितले की, कुवेतविरुद्धचा विश्वचषक पात्रता सामना हा देशासाठीचा शेवटचा सामना असेल. मात्र, छेत्री त्याच्या क्लब बेंगळुरू एफसीकडून खेळत राहील.

सुनील छेत्रीने अंडर-20 आणि 23 वर्षांखालील संघांसह भारतासाठी आपली छाप पाडली आणि त्यानंतर 2005 मध्ये वरिष्ठ संघात पदार्पण केले. तेव्हापासून तो टीम इंडियाचा भाग होता. माजी कर्णधार आणि अनुभवी स्ट्रायकर बायचुंग भुतियाच्या निवृत्तीनंतर, छेत्रीने टीम इंडियाच्या आक्रमणाची जबाबदारीही घेतली आणि एकट्याने टीम इंडियाला अनेक सामन्यांमध्ये विजय मिळवून दिला.

भारतीय कर्णधार छेत्रीने त्याच्या जवळपास 10 मिनिटांच्या दीर्घ व्हिडिओ संदेशात सांगितले की, 6 जून रोजी कोलकाता येथे होणारा कुवेत विरुद्धचा सामना हा त्याचा टीम इंडियासोबतचा शेवटचा सामना असेल. हा सामना विश्वचषक 2026 पात्रता फेरीचा भाग आहे, जिथे टीम इंडिया ग्रुप-ए मध्ये दुसऱ्या स्थानावर आहे. त्यापलीकडे फक्त कतार आहे. या क्वालिफायरमध्ये भारतीय संघाची कामगिरी विशेष राहिली नाही आणि पुढील फेरी गाठण्यासाठी त्यांना हा सामना कोणत्याही किंमतीवर जिंकावा लागेल. अशा परिस्थितीत टीम इंडिया आणि खुद्द सुनील छेत्री यांना शेवटचा सामना संस्मरणीय बनवायचा आहे.