निवासी डॉक्टरांचा विविध मागण्यांसाठी आजपासून राज्यव्यापी संप

मुख्य, मुंबई / By / निवासी डॉक्टर, महाराष्ट्र सरकार, मार्ड, राज्यव्यापी संप /


मुंबई – कोरोना काळातील शैक्षणिक शुल्क माफ करण्यासह आपल्या विविध मागण्यांसाठी राज्यभरात आजपासून (१ ऑक्टोबर) अनिश्चित काळासाठी महाराष्ट्र राज्य निवासी डॉक्टरांच्या संघटनेने (MARD) संप पुकारला आहे. मार्डची वैद्यकीय संशोधन आणि संचालनालयाच्या संचालकांसोबत या संपाबाबत सेंट जॉर्ज रुग्णालयात गुरुवारी (३० सप्टेंबर) रात्री उशीरापर्यंत बैठक सुरू झाली होती. दरम्यान, सायनच्या लोकमान्य टिळक म्युनिसिपल मेडिकल कॉलेजच्या निवासी डॉक्टरांनी या पार्श्वभूमीवर एएनआय या वृत्तसंस्थेशी बोलताना आपली भूमिका मांडली आहे.

आम्हाला लेखी आश्वासन हवे आहे. रुग्णांच्या सेवेमध्ये तडजोड होणार नाही, याची दक्षता घेत आम्ही आपत्कालीन सेवा बंद केली नाही. शैक्षणिक शुल्क माफ केलेच पाहिजे, कारण कोरोना काळादरम्यान शैक्षणिक हालचाली मंदावल्या होत्या. त्याचसोबत, वसतिगृहांची स्थिती देखील चांगली नाही. त्याचसोबत, बृहन्मुंबई महानगरपालिका देखील डॉक्टरांच्या वेतनातून कर कापत असल्याचे मार्डचे सदस्य डॉ. अक्षय यादव यांनी एएनआयशी बोलताना सांगितले आहे.


गेले जवळपास दीड वर्ष निवासी डॉक्टर हे कोरोना सेवेमध्ये असल्यामुळे शैक्षणिक अभ्यासक्रम शिकवलेला नाही. म्हणूनच, मार्डतर्फे गेल्या अनेक महिन्यांपासून शैक्षणिक शुल्क माफ करण्याची मागणी केली जात आहे. दोन महिन्यांपूर्वी वैद्यकीय शिक्षणमंत्र्यांसोबत झालेल्या बैठकीत मंत्री अमित देशमुख यांनी या मागणीचा सकारात्मक विचार करण्याचे आश्वासन दिले होते. परंतु, त्यानंतरही यावर विभागाने ठोस कार्यवाही केलेली नाही. दरम्यान, हा संप सुरु असला तरी आपत्कालीन आणि अतिदक्षता विभागातील सेवा सुरू असतील, असे मार्डने स्पष्ट केले आहे.