मुंबई – १८००-१२३४-२७५ आणि १८००-२६७३-८८९ या टोल फ्री क्रमांकावर मदत केंद्र(हेल्प डेस्क/कॉल सेंटर)ची सुविधा महाराष्ट्र लोकसेवा आयोगाकडून आयोजित विविध भरतीप्रक्रियेच्या अनुषंगाने ऑनलाईन अर्जप्रणाली अथवा सर्वसाधारण प्रकारच्या अडचणी/शंका निवारणासाठी आयोगाकडून उपलब्ध करून देण्यात आली आहे. याबाबतची माहिती आयोगाने प्रसिद्धी पत्रकाद्वारे दिली आहे.
सद्यस्थितीत ऑनलाईन अर्जप्रणाली अथवा सर्वसाधारण स्वरुपाच्या अडचणी/शंकाचे या टोल फ्री क्रमांकावर निवारण होईल. तसेच, ऑनलाईन अर्ज प्रणालीच्या अनुषंगाने तांत्रिक/सर्वसाधारण पात्रता अथवा अर्ज भरण्याच्या प्रक्रियेबाबतच्या अडचणींचे निवारण देखील केले जाणार आहे. वरील टोल फ्री क्रमांकावर प्राप्त होणारे दूरध्वनी संभाषणाचे (टेलिफोन कॉल्स) आयोगाच्या कार्यालयाकडून संनियंत्रण व विश्लेषण केले जाणार आहे.
२ मार्च २०२१ पासून सोमवार ते शुक्रवार सकाळी ९ ते रात्री ८ आणि शनिवार व रविवारी सकाळी ९.३० ते सायंकाळी ६.३० यावेळेत हे टोल फ्री क्रमांक कार्यान्वित राहणार असल्याचे आयोगाकडून सांगण्यात आलेले आहे. तसेच टोल फ्री क्रमांकाच्या सुविधे व्यतिरिक्त उमेदवारांना [email protected] या ईमेल आयडीवर तांत्रिक बाबींच्या अनुषंगाने संपर्क साधता येणार आहे.