मुंबई – सर्व प्रकारचे सार्वजनिक कार्यक्रम आणि आंदोलनांवर राज्यातील वाढता कोरोना संसर्ग रोखण्यासाठी सोमवारपासून काही दिवसांसाठी बंदी घालण्यात येत असल्याची घोषणा मुख्यमंत्री उद्धव ठाकरे यांनी केली. रविवारी राज्यातील जनतेशी उद्धव ठाकरे यांनी संवाद साधला. रुग्णवाढीची आकडेवारी आणि नागरिक नियमांचे पालन करतात की नाही, हे तपासून लॉकडाउन लागू करण्याबाबत आठ-दहा दिवसांनी निर्णय घेतला जाईल, असेही त्यांनी स्पष्ट केले.
दरम्यान राजकीय पक्षांनीही गर्दी करणारी आंदोलने, मोर्च काढू नयेत. माझ्यासह महाविकास आघाडी आणि विरोधी पक्षांनाही पक्ष वाढवायचा आहे. पण हे करताना कोरोना संसर्ग वाढणार नाही याची काळजी घ्यावी, असे आवाहन उद्धव ठाकरे यांनी यावेळी केल्यानंतर राष्ट्रवादी काँग्रेसचे अध्यक्ष शरद पवार यांनी मोठा निर्णय घेतला आहे.
आपले सर्व नियोजित कार्यक्रम रद्द करत असल्याची माहिती शरद पवार यांनी ट्विट करत दिली आहे. ते म्हणाले की, कोरोनाच्या वाढत्या प्रादुर्भावाच्या पार्श्वभूमीवर तसेच माननीय मुख्यमंत्री व उपमुख्यमंत्री यांनी केलेल्या आवाहनानंतर मी माझे सर्व नियोजित सार्वजनिक कार्यक्रम रद्द केले आहेत.