अजित पवारांचा वैयक्तिक निर्णय, राष्ट्रवादीचा पाठिंबा नाही – शरद पवार

महाराष्ट्र, मुख्य / By / अजित पवार, राष्ट्रवादी काँग्रेस, शरद पवार /

गेली अनेक दिवसांपासून महाराष्ट्रात सत्ता स्थापनेवरून काँग्रेस-शिवसेना-राष्ट्रवादी काँग्रेस या तिन्ही पक्षांमध्ये चर्चा सुरू असताना भाजपने सगळ्यांना धक्का देत राष्ट्रवादी काँग्रेस नेते अजित पवार यांच्या पाठिंब्याने सत्ता स्थापन केली आहे. मात्र आता राष्ट्रवादी काँग्रेसचे अध्यक्ष शरद पवार यांनी या हा वैयक्तिक निर्णय असून याला आमचा पाठिंबा नसल्याचे म्हटले आहे.

राष्ट्रवादी काँग्रेसचे अध्यक्ष शरद पवार यांनी ट्विट करत याबाबत आपले म्हणणे मांडले.

काँग्रेस-शिवसेना-राष्ट्रवादी काँग्रेस हे तिन्ही पक्ष उद्धव ठाकरे यांच्या नेतृत्वाखाली सरकार स्थापन करणार असे जवळपास निश्चित झाले होते. मात्र एका रात्रीत घडलेल्या राजकीय घडामोडीनंतर सकाळी 8 वाजता फडणवीस यांनी मुख्यमंत्रीपदाची व अजित पवार यांनी उपमुख्यमंत्रीपदाची शपथ घेत सर्वांना आश्चर्याचा धक्का दिला.

हा पाठीत खंजिर खूपसण्याचा प्रकार असल्याचे शिवसेनेने म्हटले आहे. शिवेसना नेते संजय राऊत म्हणाले की, अजित पवार रात्री बैठकीला उपस्थित होते. मात्र अचानक रात्री त्यांचा फोन बंद येत होता. राष्ट्रवादीला देखील अचानक काय घडले हे माहीती नाही.

राऊत म्हणाले की, शिवसेना प्रमुख उद्धव ठाकरे आणि शरद पवार हे पत्रकार परिषद घेतील. ते म्हणाले, अजित पवारांच्या निर्णयाशी शरद पवार यांचे काहीही देणेघेणे नाही. अजित पवार यांनी छत्रपती शिवाजी महाराजांचा आणि महाराष्ट्राच्या जनतेचा अपमान केला आहे.