पाकिस्तान क्रिकेट संघ सध्या अत्यंत वाईट टप्प्यातून जात आहे. 2024 च्या टी20 विश्वचषकात संघाची कामगिरी अशी होती की अमेरिकेविरुद्धही पराभवाचा सामना करावा लागला होता. त्याच वेळी, प्रत्येक वेळी प्रमाणेच यावेळी देखील भारतीय संघाने त्याचा पराभव केला. त्यानंतर सर्व खेळाडू पाकिस्तानी चाहत्यांच्या निशाण्यावर आहेत. दरम्यान, पाकिस्तान संघाचा कर्णधार बाबर आझमचा एक व्हिडिओ सोशल मीडियावर व्हायरल झाला आहे, ज्याला पाहून चाहते त्याला प्रचंड ट्रोल करत आहेत.

बाबर आझमच्या फिटनेस सेशनचा एक व्हिडिओ सोशल मीडियावर व्हायरल होत आहे, ज्यामध्ये तो धावताना दिसत आहे. मात्र तो अजिबात फिट दिसत नसल्याने चाहते त्याला ट्रोल करत आहेत. या व्हिडिओमध्ये त्याचे पोट बाहेर आलेले दिसत आहे. या व्हिडीओत बाबर मोठे पोट घेऊन धावत आहे. यावर युजर्सनी बाबरला ट्रोल करण्यास सुरुवात केली. बाबरचे पोट वाढत आहे, ते कमी करायला हवे, असे युजर्सचे म्हणणे आहे. ही पहिलीच वेळ नसली, तरी याआधीही बाबर आझमच्या फिटनेसवर अनेकदा प्रश्न उपस्थित झाले आहेत.

पाकिस्तानचे माजी क्रिकेट संचालक मोहम्मद हाफीज यांनीही पाकिस्तानी खेळाडूंच्या फिटनेसवर प्रश्न उपस्थित केले आहेत. मोहम्मद हाफीजने एका पाकिस्तानी वाहिनीशी बोलताना सांगितले होते की, बाबर आझम आणि मिकी आर्थर यांच्या काळात खेळाडू फिटनेसवर अजिबात काम करत नव्हते. बाबर आणि आर्थरसाठी खेळाडूंच्या फिटनेसला प्राधान्य नव्हते. संघात असे काही खेळाडू असल्याचेही त्याने उघड केले होते, ज्यांना 2 किलोमीटरही धावता येत नाही.

2023 च्या एकदिवसीय विश्वचषकानंतर बाबर आझमने पाकिस्तान संघाचे कर्णधारपद सोडले. यानंतर मार्च 2024 मध्ये त्याला पुन्हा एकदा पांढऱ्या चेंडूचा कर्णधार बनवण्यात आले. मात्र त्याच्या नेतृत्वाखाली संघाला पुन्हा एकदा पराभवाला सामोरे जावे लागले. तो स्वतःही फ्लॉप ठरला होता. 2024 च्या टी-20 विश्वचषकात त्याने 4 सामन्यात केवळ 122 धावा केल्या होत्या. या काळात त्याच्या बॅटमधून एकही अर्धशतक झाले नाही आणि त्याचा स्ट्राईक रेटही 101.66 राहिला.