अंबानी-टाटांची हातमिळवणी, नेटफ्लिक्स, हॉटस्टार, ॲमेझॉनला देणार टक्कर

बिझनेस स्टँडर्डच्या रिपोर्टनुसार, रिलायन्स वॉल्ट डिस्नेकडून हा स्टेक खरेदी करू शकते. यामुळे रिलायन्स टेलिव्हिजन वितरण क्षेत्रात आपले स्थान मजबूत करू शकते. याशिवाय, यामुळे रिलायन्सच्या OTT प्लॅटफॉर्म JioCinema ची पोहोच देखील वाढेल. टाटा प्लेने या संदर्भात ईटी ऑनलाइनच्या प्रश्नांना प्रतिसाद दिला नाही. टाटा समूहाची होल्डिंग कंपनी टाटा सन्सची टाटा प्लेमध्ये 50.2 टक्के भागीदारी आहे. सिंगापूर फंड टेमासेकचा टाटा प्लेमध्ये 20 टक्के हिस्सा आहे.

ईटीच्या बातमीनुसार, गेल्या वर्षी ऑक्टोबरमध्ये सूत्रांच्या हवाल्याने सांगण्यात आले होते की, टेमासेक टाटा प्लेमधील आपला हिस्सा टाटा समूहाला विकण्यासाठी बोलणी करत आहे. मात्र या प्रकरणी दोघांमधील चर्चा पुढे सरकू शकली नाही. आता रिलायन्स आणि टाटा प्ले यांच्यातील करार निश्चित झाला तर टाटा समूह आणि रिलायन्स समूह यांच्यातील हा पहिलाच उपक्रम असेल. यामुळे रिलायन्सच्या स्ट्रीमिंग प्लॅटफॉर्म JioCinema ला टाटा प्लेच्या ग्राहकांपर्यंत पोहोचण्याची संधी मिळेल. सूत्रांनी दिलेल्या माहितीनुसार, जर हा करार झाला, तर रिलायन्सला त्याच्या स्ट्रीमिंग प्लॅटफॉर्म JioCinema चे संपूर्ण कंटेंट कॅटलॉग टाटा प्ले ग्राहकांना देऊ करायचे आहे.

बिझनेस स्टँडर्डच्या अहवालानुसार, बँकर्स सध्या टाटा प्लेमधील डिस्नेच्या स्टेकचे मूल्यमापन करत आहेत. टाटा प्लेची बाजारात चांगली पकड आहे, परंतु नेटफ्लिक्स, हॉटस्टार, जिओसिनेमा आणि ॲमेझॉन प्राइम यांच्याकडून त्याला कठीण स्पर्धेचा सामना करावा लागत आहे. टाटा प्लेला गेल्या आर्थिक वर्षात 105 कोटी रुपयांचा तोटा झाला होता. आर्थिक वर्ष 2022 मध्ये कंपनीला 68.60 कोटी रुपयांचा नफा झाला होता.