नवी दिल्ली – दिल्लीतही यंदाची दिवाळी फटाक्यांशिवाय राहणार आहे. दिल्लीचे पर्यावरण मंत्री गोपाल राय यांनी बुधवारी सांगितले की, राष्ट्रीय राजधानीत 1 जानेवारीपर्यंत सर्व प्रकारच्या फटाक्यांच्या उत्पादन, विक्री आणि वापरावर बंदी घालण्यात येणार आहे. फटाक्यांच्या ऑनलाइन विक्रीवरही ही बंदी लागू असल्याचे ते म्हणाले.
त्यांनी ट्विटरवर म्हटले आहे की, दिल्लीतील जनतेला प्रदूषणाच्या संकटापासून वाचवण्यासाठी गेल्या वर्षीप्रमाणेच याही वेळी सर्व प्रकारच्या फटाक्यांच्या उत्पादन, साठवणूक, विक्री आणि वापरावर पूर्णपणे बंदी घालण्यात आली आहे, जेणेकरून लोकांचे प्राण वाचू शकतील.
यावेळी दिल्लीत फटाक्यांची ऑनलाइन विक्री/वितरण यावरही बंदी असेल, अशी माहिती त्यांनी दिली. ही बंदी 1 जानेवारी 2023 पर्यंत लागू राहील. बंदीच्या कडक अंमलबजावणीसाठी दिल्ली पोलिस, डीपीसीसी आणि महसूल विभागासोबत कृती आराखडा तयार केला जाईल.
गेल्या वर्षी दिल्ली सरकारने 28 सप्टेंबर ते 1 जानेवारी 2022 पर्यंत दिल्लीत फटाके विक्री आणि फोडण्यावर पूर्ण बंदी घालण्याचे आदेश दिले होते. फटाके जाळण्याविरोधात जनजागृती करण्यासाठी शहर सरकारने ‘जलाओ फटाके’ ही मोहीमही सुरू केली होती. त्याचबरोबर फटाके फोडणाऱ्यांवर कायदेशीर कारवाई करण्यात आली.