पणजी – सहकारी महिलेवर लैंगिक अत्याचार केल्याप्रकरणी तुरुंगात असलेले ‘तहलका’चे माजी संपादक तरुण तेजपाल याच्या कोठडीत 4 जानेवारीपर्यंत वाढ करण्यात आली आहे. तेजपाल याला सुनाविण्यात आलेल्या न्यायालयीन कोठडीची मुदत आज (सोमवार) संपल्याने त्याला पणजी सत्र न्यायालयात हजर करण्यात आले. यावेळी त्याला आणखी बारा दिवस कोठडीत ठेवण्याचे आदेश देण्यात आले.

त्यामुळे तेजपाल याला नवीन वषार्चे स्वागत कारागृहातच करावे लागणार आहे. गोव्यातील एका पंचतारांकित हॉटेलमध्ये तहलका मासिकाने आयोजित केलेल्या कार्यक्रमादरम्यान तेजपालने लैंगिक शोषण केल्याचा आरोप त्याच्या सहकारी पत्रकार तरुणीने केल्यानंतर गोवा पोलिसांनी त्याला 30 नोव्हेंबरला अटक केली होती. तेव्हापासून त्याची चौकशी करण्यात येत आहे.