कराची – पाकिस्तान महिला क्रिकेट महिला संघातील तीन सदस्यांना कोरोनाची लागण झाली असल्याची माहिती पाकिस्तान क्रिकेट बोर्डाने (पीसीबी) दिली. संघाचे खेळाडू कराचीतील हनिफ मोहम्मद हाय-परफॉर्मन्स सेंटरमध्ये वेस्ट इंडिजविरुद्धच्या त्यांच्या एकदिवसीय मालिकेच्या पूर्वतयारीच्या उद्देशाने जमले होते. टीममधील सर्व सदस्यांची बुधवारी कोरोना चाचणी करण्यात आली, ज्यामध्ये तीन जणांचा अहवाल पॉझिटिव्ह आला आहे.
पण, या खेळाडूंच्या नावांची माहिती पीसीबीने दिलेली नाही, ज्यांची चाचणी पॉझिटिव्ह आली आहे, त्यांना आता १० दिवस कडक आयसोलेशनमध्ये राहावे लागणार आहे. पुढील महिन्यात ६ नोव्हेंबर रोजी क्वारंटाइन कालावधी संपेल. कोरोना प्रोटोकॉल अंतर्गत, टीमच्या उर्वरित सदस्यांना २ नोव्हेंबरपर्यंत आयसोलेशनमध्ये ठेवण्यात आले आहे. या खेळाडूंना प्रत्येक दिवशी एक चाचणी द्यावी लागेल. शिबिरासाठी तयार करण्यात आलेल्या बायो-बबलमध्ये प्रवेश करण्यापूर्वी मे महिन्यात प्रत्येकाचे कोरोना लसीकरण करण्यात आले.
वेस्ट इंडिजचा महिला संघ एकदिवसीय मालिकेसाठी पाकिस्तान दौऱ्यावर जाणार आहे. दोन्ही संघ ८ ते १४ नोव्हेंबर दरम्यान तीन एकदिवसीय सामने खेळणार आहेत. कराचीतील नॅशनल स्टेडियमवर सामने खेळवले जातील. यापूर्वी पाकिस्तानने वेस्ट इंडिजमध्ये तीन टी-२० आणि पाच एकदिवसीय सामने खेळले होते. पाकिस्तानचा पुरुष संघ टी-२० विश्वचषक स्पर्धेसाठी यूएईमध्ये आहे.