नवी दिल्ली,दि.३१- केंद्रीय कृषीमंत्री शरद पवार यांच्या निवासस्थानाबाहेर निदर्शने करण्यात आलीत. अण्णा हजारे यांच्या समर्थकांनी ही निदर्शने केली आहे.१५ भ्रष्ट मंत्र्यांविरोधात आणि लोकपालच्या मागण्यांसाठी अण्णा हजारे आणि टीम अण्णा जंतरमंतरवर उपोषणाला बसली आहे.
ज्येष्ठ समाजसेवक अण्णा हजारे यांच्या उपोषणाचा दुसरा तर टीम अण्णाच्या उपोषणाचा सहावा दिवस आहे. अण्णांच्या उपोषणाच्या दुसर्या दिवशीही जंतरमंतर गर्दीने फुलून गेले आहे. भ्रष्टाचार आणि लोकपालच्या मुद्यावर अण्णा आणि सरकारमध्ये आरपारची लढाई सुरू झाली आहे.
लोकांनी देशासाठी एक आठवडा द्यावा, अशी विनंती अण्णांनी जनतेला केली. अण्णा हजारे उपोषणाला बसताच जंतरमंतरवरील हरवलेले चैतन्य पुन्हा एकदा परतले. अण्णांच्या आंदोलनाला समर्थन देणार्यांची संख्या वाढतच असल्याचे चित्र पाहायला मिळत आहे. सुरूवातीला टीम अण्णांनी उपोषण सुरू केल्यानंतर जंतरमंतरवर अण्णा समर्थकांची फारशी गर्दी नव्हती मात्र आता गर्दी वाढल्याने या आंदोलनाचा नूर पालटला आहे.
