मुंबई दि.२०-‘यूपीए’चे राष्ट्रपतिपदाचे उमेदवार प्रणव मुखर्जी यांच्या उमेदवारीस शिवसेनेने पाठिंबा दिला याचा अर्थ काँग्रेसला पाठिंबा दिला असा होत नाही, असे स्पष्ट प्रतिपादन शिवसेनेचे कार्याध्यक्ष उद्धव ठाकरे यांनी बुधवारी येथे केले. ते म्हणाले, होय, आम्ही मुखर्जींना राष्ट्रपतिपदाच्या निवडणुकीत पाठिंबा दिला, पण, त्याचा अर्थ काँग्रेसला नाही, असे शिवसेनेच्या ४६ व्या वर्धापन दिनानिमित्त आयोजित कार्यक्रमात उद्धव यांनी सांगितले.
एनडीएला संघटित राहण्याचे आवाहन करीत ते म्हणाले की, योग्य मार्ग निवडण्याची एनडीएला गरज आहे. आपले विरोधक लढाईला सज्ज आहेत. मात्र, आपण अद्यापही म्यानातल्या तलवारीला हात घालत नाही. काँग्रेसविरोधी लाटेचा एनडीएने लाभ उठवावा, असे सांगून ठाकरे म्हणाले की, काँग्रेसला योग्य सक्षम पर्याय देण्यासाठी आपण संघटित राहिले पाहिजे.
२०१४ च्या निवडणुका जिंकण्यासाठी शिवसैनिकांनी सज्ज राहिले पाहिजे. आपल्याला त्या निवडणुका जिंकल्याच पाहिजेत. शिवसेना-भाजप-रिपाइं(आठवले गट) यांची महायुती २०१४ च्या राज्य विधानसभा निवडणुकीत बहुमत मिळवून सत्तेवर येईल, असेही ते म्हणाले.
