पुणे दि.५- एचआयव्ही पॉझिटिव्ह असलेल्या लोकांना कामाच्या ठिकाणी, सार्वजनिक जीवनात वेगळी वागणूक दिली जाऊ नये यासाठी सरकारने सुरू केलेल्या मोहिमेला आता दोन दशकांपेक्षा अधिक काळ लोटला आहे तसेच सरकारने या साठी राबविलेल्या मोहिमा, केलेल्या जाहिराती यावरही कोट्यावधी रूपये खर्च केले आहेत. मात्र असे असले तरी सरकारी विभागातच याबाबत अपवाद केला जात असल्याची घटना पुण्यात घडली आहे. पुण्यातील ४१ वर्षीय बसचालकाला राज्य परिवहन विभागाने एचआयव्ही पॉझिटिव्ह असल्यामुळे सरळ कामावरूनच कमी केले आहे. कुटुंबातील एकमेव कमावता असलेला हा चालक त्यामुळे अडचणीत आला आहेच पण त्याच्या मुलाचे शिक्षणही त्यामुळे बंद पडले असून हा मुलगा सध्या सुरक्षारक्षक म्हणून काम करत आहे असे समजते.