मुंबई – अंगणवाडी केंद्रासाठी देशभरात पर्यवेक्षक, अंगणवाडी सेविका आणि मदतनीस पदासाठी २६ लाख ८४ हजार ५५७ कर्मचा-यांची आवश्यकता असून २४ लाख ४८ हजार ९३६ पदे भरली असताना अद्यापही दोन लाख ३५ हजार ६२१ पदे रिक्त असल्याचे उघडकीस आले आहे.

केंद्र सरकारतर्फे राबवण्यात येणा-या एकात्मिक बाल विकास योजनेची जबाबदारी राज्य सरकारकडे सोपवण्यात आलेली असून स्थानिक प्रशासकीय अधिका-यांचे दुर्लक्ष आणि कायदेविषयक अडचणींमुळे या रिक्त जागा भरण्यात अडचणी येत असल्याचे पत्र सूचना कार्यालयातर्फे दिलेल्या माहितीत म्हटले आहे.

या रिक्त जागा भरण्याचे निर्देश केंद्र सरकारच्या महिला व बाल कल्याण विभागातर्फे वारंवार दिले जातात. मात्र स्थानिक प्रशासकीय अधिकारी याबाबत उदासिन असल्याने बाल विकास कार्यक्रम अपेक्षेप्रमाणे राबवला जात नसल्याचे या पत्रकात म्हटले आहे.