हत्येचा गुन्हा दाखल, पण कोणीही देणार नाही शाकिब अल हसनला त्रास…बीसीबीने केले देशात परतण्याचे आवाहन

गेल्या महिन्यात बांगलादेशच्या माजी पंतप्रधान शेख हसीना यांचे सरकार पडल्यानंतर देशात अशांतता आहे. शाकिब अल हसन हा या वर्षाच्या सुरुवातीला हसीना यांच्या अवामी लीग पक्षाकडून खासदार झाला होता आणि सरकारचा एक भाग होता. त्यानंतर काही दिवसांनी आंदोलक विद्यार्थ्याच्या मृत्यूप्रकरणी 147 जणांविरुद्ध खुनाचा गुन्हा दाखल करण्यात आला आणि त्यात शाकिबलाही आरोपी करण्यात आले. यामुळे सर्वांनाच धक्का बसला. शाकिब त्यावेळी बांगलादेशात नव्हता, पण या संपूर्ण घटनेनंतर तो आपल्या देशात परतला नाही.

शाकिबविरुद्ध एफआयआर दाखल झाल्यापासून बांगलादेशात परतल्यावर त्याला अटक होणार की नाही, अशी अटकळ बांधली जात आहे. या भीतीमुळे शाकिबच्या बांगलादेशात परतण्याबाबत अजूनही शंका असून ही शंका आणि भीती दूर करण्यासाठी बांगलादेश क्रिकेट बोर्डाचे अधिकारी शहरयार नफीस यांनी आवाहन केले आहे. मंगळवारी नफीसने ढाका येथे विश्वास व्यक्त केला की, शाकिब देशात परतेल आणि त्याला कोणत्याही प्रकारची अडचण येणार नाही. बांगलादेशी बोर्डाच्या क्रिकेट ऑपरेशन्सचे प्रमुख नफीस म्हणाले की देशाच्या काळजीवाहू सरकारचे मुख्य सल्लागार, कायदेशीर सल्लागार आणि क्रीडा सल्लागार यांनी शकीबच्या बाबतीत परिस्थिती अगदी स्पष्ट केली आहे की त्याला किंवा कोणालाही विनाकारण त्रास दिला जाणार नाही.

नफीस म्हणाले की, जर शाकिबला फिटनेसशी संबंधित समस्या येत नसतील, तर दक्षिण आफ्रिकेविरुद्धच्या घरच्या कसोटी मालिकेत शकिबने न खेळण्याचे कारण नाही. ईएसपीएन क्रिकइन्फोच्या वृत्तानुसार, बांगलादेशचे कायदेशीर सल्लागार आसिफ नजरुल यांनी शाकिबला देशात परतल्यावर अटक होणार नाही, अशी आशा व्यक्त केली होती. स्टार अष्टपैलू खेळाडूविरुद्ध फक्त एकच एफआयआर नोंदवण्यात आला असून पोलिसांना जास्तीत जास्त संयम बाळगण्यास सांगण्यात आल्याचे त्यांनी सांगितले होते. गेल्या महिन्यात हसीना यांचे सरकार पडले, तेव्हा शाकिब देशात नव्हता, पण तेव्हापासून तो परतला नाही.