नवी दिल्ली : राष्ट्रपतीपदाच्या निवडणुकीच्या मतमोजणीची पहिली फेरी पूर्ण झाली आहे. या फेरीत खासदारांच्या मतांची मोजणी झाली असून त्यात द्रौपदी मुर्मू यांना मोठी आघाडी मिळाली आहे. मतमोजणीत गुंतलेल्या अधिकाऱ्यांनी दिलेल्या माहितीनुसार, द्रौपदी मुर्मू यांना 748 पैकी 540 मते मिळाली. याशिवाय यशवंत सिन्हा यांना 208 मते मिळाली आहेत. त्याचवेळी मतमोजणीदरम्यान 15 मते अवैध आढळून आली. एकूण 748 वैध मते सापडली असून त्यांचे मूल्य 5 लाख 23 हजार 600 एवढे आहे. त्यापैकी 540 मते द्रौपदी मुर्मू यांना मिळाली असून, ज्यांचे मूल्य 3,78,000 आहे. दुसरीकडे यशवंत सिन्हा मोठ्या मताधिक्याने मागे पडलेले दिसतात. त्यांना केवळ 208 मते मिळाली असून त्यांची मते केवळ 1,45,600 एवढीच असल्याचा अंदाज आहे.
अशाप्रकारे यशवंत सिन्हा यांना एक तृतीयांशपेक्षा कमी मते मिळाली आहेत. हाच ट्रेंड कायम राहिला, तर द्रौपदी मुर्मू यांना मोठा विजय मिळू शकतो. राज्यसभेच्या महासचिवांनी मतमोजणीच्या पहिल्या फेरीची माहिती दिली. ते म्हणाले की, आता हे पहिल्या फेरीचे निकाल आले आहेत. आता राज्यांतील आमदारांच्या मतांची मोजणी होणार आहे. JMM, अकाली दल, SubhaSP, शिवसेना, TDP, YSR काँग्रेस आणि बिजू जनता दल यासह अनेक गैर NDA पक्षांनी द्रौपदी मुर्मू यांना पाठिंबा दिला होता. अशा स्थितीत पुढील फेरीत आमदारांच्या मतमोजणीत त्यांना मोठी आघाडी मिळण्याची अपेक्षा आहे.
मतमोजणीत सहभागी असलेल्या अधिकाऱ्यांचे म्हणणे आहे की, राष्ट्रपती निवडणुकीचा अंतिम निकाल येत्या दीड ते दोन तासांत म्हणजे संध्याकाळपर्यंत समोर येऊ शकतो. दरम्यान, ओडिशातील मयूरभंज जिल्ह्यात असलेल्या द्रौपदीच्या गावात जल्लोषाचे वातावरण आहे. याशिवाय दिल्लीतील त्यांच्या घरीही सेलिब्रेशनची तयारी सुरू आहे. त्यांच्या विजयाची घोषणा होताच पंतप्रधान नरेंद्र मोदी आणि सरकारचे अनेक वरिष्ठ मंत्री त्यांच्या घरी पोहोचून त्यांचे अभिनंदन करू शकतात, असे वृत्त आहे. जर द्रौपदी मुर्मू राष्ट्रपती बनल्या, तर देशाच्या सर्वोच्च पदावर पोहोचणाऱ्या त्या पहिल्या महिला आदिवासी नेत्या असतील.