नवी दिल्ली – दहशतवादाचे मनसुबे उद्ध्वस्त केल्यानंतर केंद्र सरकार आता दरवर्षीप्रमाणे यंदाही दहशतवाद विरोधी दिन साजरा करणार आहे. याबाबत सर्व राज्ये आणि केंद्रशासित प्रदेशांना पत्र पाठवण्यात आले आहे. गृह मंत्रालयाने जारी केलेल्या पत्रानुसार, दरवर्षी 21 मे रोजी दहशतवाद विरोधी दिन साजरा केला जाईल. हे पत्र सर्व राज्यांचे मुख्य सचिव, सर्व मंत्रालये आणि विभागांच्या सचिवांना पाठवण्यात आले आहे.
तरुणांना केले जाईल जागरूक
हा दिवस साजरा करण्याचा उद्देश तरुणांना दहशतवाद आणि हिंसाचारापासून दूर ठेवणे हा असल्याचे पत्रात म्हटले आहे. दहशतवादाचा नायनाट करण्यासाठी केंद्र सरकारने कोणकोणत्या योजना राबविल्या आहेत, हे त्यांना सांगितले जाईल. याशिवाय त्यांची एक चूक ही राष्ट्रीय समस्या कशी बनू शकते, हे त्यांना सांगण्यात येईल. तरूण योग्य मार्गावर आले, तर दहशतवाद आपोआप संपेल, असा विश्वास केंद्राने व्यक्त केला आहे.
दिली जाईल दहशतवादविरोधी प्रतिज्ञा
सर्व कार्यालये, सार्वजनिक ठिकाणी दहशतवादविरोधी शपथही घेतली जाईल, असे पत्रात म्हटले आहे. याशिवाय डिजिटल आणि सोशल मीडिया प्लॅटफॉर्मच्या माध्यमातून दहशतवादविरोधी संदेशही प्रसारित केला जाऊ शकतो. 21 मे रोजी शनिवार असल्यामुळे केंद्र सरकारच्या कार्यालयांना सुट्टी असेल, असे या पत्रात म्हटले आहे. अशा परिस्थितीत 20 मे रोजी शपथ घेतली जाऊ शकते. तथापि, राज्य सरकारी कार्यालयांमध्ये किंवा शनिवार सुट्टी नसलेल्या ठिकाणी 21 मे रोजीच शपथ घेण्यात यावी.