पाटणा : आठ वर्षांपूर्वी पाटण्यातील गांधी मैदानावर नरेंद्र मोदींच्या हुंकार सभेदरम्यान बॉम्बस्फोटांची मालिका घडली होती. आज एनआयएच्या विशेष न्यायालयाने याप्रकरणी मोठा निर्णय दिला आहे. एनआयए न्यायालयाने बॉम्बस्फोट प्रकरणी एका आरोपी फखरुद्दीनची सुटका केली आहे. त्याचबरोबर हैदर अली, नुमान अन्सारी, मजीबुल्लाह, उमर सिद्दीकी, फिरोज अस्लम, इम्तियाज आलम यांच्यासह नऊ जणांना शिक्षा सुनावण्याची तारीख निश्चित केली आहे. शिक्षा 1 नोव्हेंबर रोजी सुनावण्यात येणार आहे. या प्रकरणात आतापर्यंत 187 जणांची न्यायालयात सुनावणी झाली आहे.
पाटणा येथील गांधी मैदान पोलीस ठाण्यात गांधी मैदान सीरियल बॉम्बस्फोट प्रकरणी 27 ऑक्टोबर 2013 रोजी एफआयआर दाखल करण्यात आला होता. त्यानंतर एनआयएने 31 ऑक्टोबर 2013 रोजी या प्रकरणाचा ताबा घेतला आणि दिल्ली एनआयए पोलिस ठाण्यात 1 नोव्हेंबर रोजी पुन्हा एफआयआर नोंदवण्यात आला. यामध्ये एका अल्पवयीन मुलासह 12 जणांविरोधात आरोपपत्र दाखल करण्यात आले. त्यापैकी एकाचा उपचारादरम्यान मृत्यू झाला. त्याच बरोबर, अल्पवयीन आरोपीला यापूर्वीच जुवेनाईल बोर्डाने तीन वर्षांची शिक्षा सुनावली आहे.
दरम्यान यापूर्वीच या प्रकरणात आरोपी असलेल्या पाच दहशतवाद्यांना अन्य एका प्रकरणात जन्मठेपेची शिक्षा सुनावण्यात आली आहे. यामध्ये उमर सिद्दीकी, अझरुद्दीन, अहमद हुसेन, फक्रुद्दीन, फिरोज आलम उर्फ पप्पू, नुमान अन्सारी, इफ्तिखार आलम, हैदर अली उर्फअब्दुल्ला उर्फ ब्लॅक ब्युटी, मोहम्मद आलम उर्फ पप्पू मोजिबुल्ला अन्सारी आणि इम्तियाज अन्सारी ऊर्फ आलम यांचा समावेश आहे. यापैकी बोधगया साखळी बॉम्बस्फोटप्रकरणी इम्तियाज, उमर, अझहर, मोजिबुल्ला आणि हैदर यांना जन्मठेपेची शिक्षा झाली आहे.
आठ वर्षांपूर्वी पाटण्यातील गांधी मैदानावर नरेंद्र मोदींची हुंकार रॅली झाली होती. नरेंद्र मोदी हे त्यावेळी भारतीय जनता पक्षाकडून राष्ट्रीय लोकशाही आघाडीचे पंतप्रधानपदाचे उमेदवार होते. त्या रॅलीव्यतिरिक्त पाटणा जंक्शनच्या प्लॅटफॉर्म क्रमांक 10 वरही स्फोट झाला. यात सहा जणांचा मृत्यू झाला होता, तर 80 हून अधिक जण जखमी झाले होते.