कमरेचे सोडून डोक्याला बांधून अग्रलेख लिहिण्याच्या विकृतीला बांध घाला – गोपीचंद पडळकर

मुख्य, मुंबई, व्हिडिओ / By / गोपिचंद पडळकर, नारायण राणे, भाजप आमदार, शिवसेना नेते, संजय राऊत /


मुंबई – आता भोक पडलेल्या फुग्याला आपल्या हुजरेगिरीमुळे बावचळलेले खासदार संजय राऊत एवढे का घाबरत आहेत? असे तर नाही की तुमच्याविषयीच्या गुपितांनी राणे साहेबांचा फुगा भरलेला आहे. तो फुटला तर तुमच्या तिन्ही धन्यांचा तुमच्यावरचा विश्वास उडून जाईल, अशी टीका भाजप आमदार गोपीचंद पडळकर यांनी केली आहे. राणे साहेबांवरील सुडाची कारवाई म्हणजे कायद्याची कारवाई असे संबोधता, मग पोलिसांना त्यांच्या आई बहिणीवरून अत्यंत घाणरेड्या शब्दात शिव्या घालणाऱ्या वरूण देसाईला अटक का होत नाही? हेच का तुमचे महाराष्ट्र मॉडेल असा प्रश्न त्यांनी उपस्थित केला.


ते पुढे म्हणाले, आयुष्यभर काँग्रेसी विचारांचा ज्या बाळासाहेबांनी विरोध केला आणि शरद पवारांचे नेहमी मार्मिक शब्दाने पितळ उघड पाडले, पण तुम्ही आज त्यांचाच उधोउधो करणे म्हणजे बाळासाहेबांच्या हिंदुत्वाच्या पाठीत खंजीर खुपसण्याचा प्रकार नाही का? महाराष्ट्रात येऊन हिंदू समाजाला सडलेला म्हणणारा शर्जील उस्मान उजळ माथ्याने फिरतो आणि त्यावर कारवाई करण्याऐवजी सत्तेच्या लालसेपोटी तुमचे हात थरथर कापतात. मला बाळासाहेबांच्या सामनाचे दैनिक ‘बाबरनामा’त रूपांतर करणाऱ्याला हेच विचारायचे आहे की त्यावेळी यांची अस्मिता कुणाच्या पायापुढे लोटांगण घालते?

संजय राऊत, कमरेचे सोडून डोक्याला बांधून अग्रलेख लिहीण्याची विकृतीला बांध घाला अन्यथा तुमच्या ‘हम करे सो’ या कायद्याच्या फुग्याला देशाच्या कानाकोपऱ्यातून भोके पडतील, असेही पडळकर म्हणाले आहेत.