मुंबई : मुंबई महानगरपालिकेने कोरोना लसीकरणासाठी नवीन सुधारित नियमावली जाहीर केली असून त्यानुसार परदेशात शिक्षणासाठी जाणाऱ्या विद्यार्थ्यांना आता थेट लस दिली जाणार आहे. ही सुविधा पालिकेच्या कस्तुरबा, राजावाडी, कूपर रुग्णालयात उपलब्ध करून दिली जाणार आहे. परदेशात उच्च शिक्षणासाठी जाणाऱ्या १८ ते ४४ वयोगटातील विद्यार्थ्यांना वैध पुरावा दाखवून सोमवार, मंगळवार, बुधवार या तीन दिवशी कोरोना प्रतिबंधक लस घेता येणार आहे. तसेच यापुढे ४५ वर्षांवरील नागरिकांनाही सोमवार, मंगळवार व बुधवार या दिवशी नजीकच्या केंद्रावर थेट जाऊन लस घेता येणार आहे.
महानगरपालिकेच्या आधीच्या नियमामुळे जास्तीत जास्त सात हजार लाभार्थ्यांना दरदिवशी लस देता येत होती. तर ४५ वर्षांवरील १९ लाख नागरिक लसीकरणाच्या प्रतीक्षेत होते. त्यामुळे महागरपालिकेने नियमावलीत बदल करीत ४५ वर्षांवरील ज्या नागरिकांना कोव्हिशिल्डची पहिली व दुसरी मात्रा घ्यायची आहे, अशा नागरिकांना सोमवार, मंगळवार व बुधवार या दिवशी थेट लस घेता येईल. यात अपंगांना प्राधान्याने लस दिली जाणार आहे.
तसेच आरोग्य कर्मचारी व फ्रंटलाईनवर काम करणारे इतर कर्मचारी यांनाही कोव्हिशिल्ड लसीचे दुसऱ्या मात्रेचे लाभार्थी यांनाही याचा लाभ घेता येईल. स्तनदा माता यांनाही या लशीचा थेट लाभ घेता येणार आहे. दरम्यान, गुरुवार, शुक्रवार, शनिवार या दिवशी प्रत्येक लसीकरण केंद्रावर १०० टक्के लसीकरण हे कोविन अॅपवर नोंदणी करून लसीकरण केंद्र व वेळ निश्चित केल्यानंतरच केले जाणार आहे, असे पालिका प्रशासनाने स्पष्ट केले आहे.