मुंबई : 21000 ऑक्सिजन कॉन्सेन्ट्रेटर्सची ऑर्डर डिजिटल पेमेंट आणि वित्तीय सेवा पुरवणाऱ्या पेटीएमने दिली आहे, मेच्या पहिल्या आठवड्यापासून जी देशात उपलब्ध होईल, अशी माहिती पेटीएमच्या प्रवक्त्याने बुधवारी दिली. लोकांकडून 5 कोटी रुपये जमा केले होते आणि तेवढीच रक्कम कंपनीने मिळवून या 10 कोटींच्या रकमेमधून ऑक्सिजन कॉन्सेन्ट्रेटर्सची खरेदी कंपनीकडून केली जात आहे. हे ऑक्सिजन कॉन्सेन्ट्रेटर्स हवेतून ऑक्सिजन जमा करुन ज्या रुग्णांना श्वास घ्यायला त्रास होत आहे त्यांच्यासाठी कामी येतात.
वृत्तसंस्था पीटीआयला कंपनीच्या प्रवक्त्याने सांगितले की, तातडीने दिलासा देण्यासाठी पेटीएम फाउंडेशनने 21000 ऑक्सिजन कॉन्सेन्ट्रेटर्स आयात करण्याची ऑर्डर दिली आहे. आमचे संस्थापक विजय शेखर शर्मा कोविड मदत उपायांना पुढे नेण्यासाठी वैद्यकीय क्षेत्रातील तज्ञांसह एक समर्पित संघाचे नेतृत्व करीत आहेत. ऑक्सिजन कॉन्सेन्ट्रेटर्स एक असे साधन आहे, जे वातावरणाच्या हवेमधून ऑक्सिजन घेते. ऑक्सिजनची आवश्यकता असलेल्या रूग्णांसाठी हे डिव्हाइस वापरले जाऊ शकते.
त्याचबरोबर ही साधने तातडीने शासकीय रुग्णालये, कोविड केअर सुविधा, खाजगी रुग्णालये, नर्सिंग होम आणि निवासी कल्याणकारी संघटनांकडे पाठवले जातील. ऑक्सिजन फॉर लाइफ मोहिमेचा एक भाग म्हणून, पेटीएम फाऊंडेशन वेबसाइटवर, खाजगी रुग्णालये, निवासी कल्याणकारी संघटना आणि स्वयंसेवी संस्था ऑक्सिजन कॉन्सेन्ट्रेटर्सच्या खरेदीसाठी मार्गदर्शनाची विनंती करू शकतात, असे देखील प्रवक्त्याने सांगितले.