मुंबई: मुंबईच्या जे.जे. रुग्णालयात आज राष्ट्रवादी काँग्रेसचे सर्वेसर्वा शरद पवार यांनी कोरोना प्रतिबंधक लस टोचून घेतली. ते काहीवेळापूर्वीच रुग्णालयात दाखल झाले होते. शरद पवार यांच्यासोबत त्यांची कन्या आणि राष्ट्रवादी काँग्रेसच्या खासदार सुप्रिया सुळे यादेखील रुग्णालयात आल्या आहेत. याशिवाय, यावेळी जे.जे. रुग्णालयाचे अधिष्ठाता तात्याराव लहानेही उपस्थित होते. प्राथमिक तपासणी झाल्यानंतर शरद पवार यांना भारत बायोटेकची कोव्हॅक्सिन लस टोचण्यात आली. आज सकाळीच पंतप्रधान नरेंद्र मोदी यांनी दिल्लीच्या एम्स रुग्णालयात कोरोना प्रतिबंधक लस घेतली होती.
कोरोना प्रतिबंधक लस घेणारे शरद पवार हे महाराष्ट्रातील पहिले राजकीय नेते ठरले आहेत. आजपासून दुसऱ्या टप्प्यातील कोरोना लसीकरणाला देशात सुरुवात झाली. या टप्प्यात 60 वर्ष आणि त्याहून अधिक वयोगटातील नागरिकांना लस दिली जाणार आहे. तसेच गंभीर आजारांशी लढा देणाऱ्या 45 वर्षांहून अधिक वयाच्या लोकांना कोरोना लस दिली जात आहे. भारतात भारत बायोटेकची कोव्हॅक्सिन आणि पुण्यातील सीरम इन्स्टिट्यूटच्या कोव्हिशिल्ड या लसी देण्यात येत आहेत. पण कोणाला कोणती लस द्यायची याबाबत केंद्रीय आरोग्य मंत्रालयाची नियमावली ठरली आहे.