मुंबई – बारामतीत परंपरेनुसार दरवर्षी दिवाळी सण राष्ट्रवादी काँग्रेसचे ज्येष्ठ नेते खासदार शरद पवार व इतर कुटुंबातील सर्व सदस्यांच्या एकत्रित उपस्थितीत साजरा केला जातो, पण कोरोनाच्या पार्श्वभूमीवर यंदा दिवाळी पाडव्याला होणाऱ्या हितचिंतकांच्या स्नेहभेटी, शुभेच्छांचा पारंपारिक कार्यक्रम यंदा रद्द करण्याचा निर्णय पवार कुटुंबियांनी घेतल्यामुळे दिवाळीत पवारांना कार्यकर्त्यांना भेटता येणार नाही.
पवार कुटुंबीयांनी नागरिकांमध्ये कोरोना संसर्ग टाळण्यासाठी यंदा सामुहिक दिवाळी साजरी न करण्याचा निर्णय घेतल्यामुळे दरवर्षी दिवाळीत भेटण्यासाठी, शुभेच्छा देण्यासाठी येणाऱ्या सहकाऱ्यांनी, हितचिंतक बंधु-भगिनींनी यंदा बारामतीला न येता आपापल्या घरुनच शुभेच्छा द्याव्यात. आपण कोरोना प्रतिबंधक नियमांचे पालन करीत आपापल्या घरीच सुरक्षित दिवाळी साजरी करावी. कोरोनाला हरवल्यानंतर पुढची दिवाळी मात्र, पारंपरिक उत्साहात, जल्लोषात बारामतीला एकत्रित येऊन साजरी करुया असे विनंतीवजा आवाहन पवार कुटुंबियांच्या वतीने राज्यातील जनतेला व हितचिंतक बंधु-भगिनींना करण्यात आले आहे.
राष्ट्रवादीचे नेते शरद पवार, उपमुख्यमंत्री अजित पवार, खासदार सुप्रिया सुळे, आमदार रोहित पवार आणि पवार कुटुंबीयांच्यावतीने संयुक्त निवेदन प्रसिद्धीस देण्यात आले असून दरवर्षी बारामती येथे परंपरेनुसार होणारा सामुहिक दिवाळी उत्सव तसेच पाडव्याचा स्नेहभेटीचा पारंपारिक कार्यक्रम कोरोनामुळे यावर्षी रद्द करावा लागत असल्याबद्दल त्यांनी दिलगिरी व्यक्त केली आहे.
पवार कुटुंबीय दरवर्षी दिवाळीला बारामतीत येऊन बारामतीकरांसह एकत्रितपणे दिवाळी साजरा करतात. राज्यभरातून लाखो सहकारी, हितचिंतक पाडव्याला बारामतीत येऊन पवार कुटुंबीयांना भेटतात. दिवाळीच्या शुभेच्छा देतात. हा कार्यक्रम सर्वांचा आनंद, उत्साह वाढवणारा असतो. आस्था, आपुलकी, स्नेहपूर्ण वातावरणात होणाऱ्या या कार्यक्रमाची ओढ आपल्या सर्वांनाच असते.
परंतु, अनेक दशकांची सामुहिक दिवाळीची परंपरा कोरोना संकटकाळात नागरिकांच्या जीवाचा धोका टाळण्यासाठी यंदा खंडित करावी लागत असल्यामुळे इच्छा असूनही यंदा भेटता येणार नाही, याचे दु:ख निश्चितच आहे. परंतु, आपल्या कोरोना प्रतिबंधक नियमांचे काटेकोर पालन करायचे असल्यामुळे, लवकरात लवकर कोरोनाला हरवण्याचा निर्धार असल्याने आपल्याला यावर्षी एकत्र येता, भेटता येणार नाही, हे आपण समजून घेतले पाहिजे.
आपल्याला कोरोनाला हरवण्यासाठी आणखी काही काळ संयम आणि नियम पाळावे लागतील. त्यामुळे यंदाची दिवाळी आपण सर्वांनी आपापल्या घरी, कोरोना प्रतिबंधक नियमांचे पालन करुन सुरक्षितपणे साजरी करुया. स्वत:ला, कुटुंबाला, समाजाला सुरक्षित ठेवूया, असे आवाहन करीत समस्त पवार कुटुंबियांनी राज्यातील जनतेला संयुक्त निवेदनाद्वारे दिवाळीच्या, नवीन वर्षाच्या शुभेच्छा दिल्या आहेत.