कुत्सीत विचारांच्या, हलकट मनोवृत्तीचे, लबाडी व खोटे बोलण्याचे एकत्रित रुप म्हणजे देवेंद्र फडणवीस - Majha Paper

कुत्सीत विचारांच्या, हलकट मनोवृत्तीचे, लबाडी व खोटे बोलण्याचे एकत्रित रुप म्हणजे देवेंद्र फडणवीस


मुंबई : आमदार गोपीचंद पडळकर यांनी शरद पवार यांच्याविषयी केलेल्या वादग्रस्त वक्तव्यानंतर राष्ट्रवादीचे नेते आणि माजी आमदार अनिल गोटे अनिल गोटे यांनी एक पत्रक जारी करत विरोधी पक्षनेते देवेंद्र फडणवीस यांच्यावर टीका केली आहे.

माझ्याशी फडणवीसांनी केलेली दगाबाजी, विश्वासघात जगजाहीर आहे. विधानसभेत एकही धनगर येऊ नये यासाठी केलेली कारस्थाने, डावपेच आणि प्रसंगी विरोधकांना बळ देण्याचे त्यांनी केलेले उद्योग मी जाणून आहे. एकवेळ मुसलमान आला तरी चालेल, पण अनिल गोटे येता कामा नये, यासाठी माझ्या मतदारसंघात पैशांचा महापूर आला होता. पण संतापामध्ये मी कधी फडणवीस महाराष्ट्राच्या राजकारणाला लागलेला महारोग, असे म्हणणार नाही, असे वक्तव्य अनिल गोटे यांनी केले आहे.

तशी वस्तुस्थिती असली तरी तसे मी कधी बोलणार नाही, असे देखील त्यांनी पुढे म्हटले आहे. राजकारणात स्व. गोपीनाथ मुंडे यांच्या कुटुंबातील कुणीही राहू नये, अशी हलकट, नीच आणि संकुचित बुद्धी फडणवीसांचीच असू शकते, असा आरोप देखील त्यांनी पत्रकाच्या माध्यमातून केला आहे. आमदार होऊन जेमतेम आठ दिवस झालेल्या पडळकरांना नशा चढली आहे. त्यांना अद्याप भाजप आणि पक्षातील उच्चवर्णियांच्या संकुचिपणाची पुसटशी ओळखही नसल्याचे गोटे यांनी म्हटले आहे.

आपल्या पत्रकात गोटे पुढे म्हणतात, मी मुनवादी मनोवृत्तीचा प्रत्यक्ष बळी आहे. कुत्सीत विचारांच्या, हलकट मनोवृत्तीचे, लबाडी व खोटे बोलण्याचे एकत्रित रुप म्हणजे देवेंद्र फडणवीस आहे. हलक्या कानाचे ते कारस्थानी आहेत की, त्यांच्यापुढे शकुनी मामा देखील झक मारेल. प्रारंभीच्या काळात एकनाथ खडसे यांच्या विरुद्ध कारस्थान त्यांनीच रचले. खडसे दाऊदच्या बायकोसोबत फोनवर बोलतात इथपासून सुरु झालेले आरोप त्यांच्या कुटुंबापर्यंत जाऊन पोहोचले. नाथाभाऊंची चूक एवढीच की त्यांना मुख्यमंत्री होण्याची इच्छा होती.

मी अनेकदा शरद पवारांवर टीका केली. मी गेली 10 महिने त्यांच्याबरोबर काम करत आहे. दिलेल्या शब्दाला जागणे, मनात द्वेष न बाळगणे ही त्यांची विशेषता आहे. शरद पवारांवर प्रेम करणाऱ्यांची संख्या जेवढी राष्ट्रवादीत आहे त्यापेक्षा दुप्पट लोक अन्य पक्षातील आहेत, जे त्यांच्यावर प्रेम करतात. शरद पवारांना पडळकरांनी कोरोनाची उपमा दिली. यावरुन त्यांची राजकीय पात्रता, मनाची क्षुद्रता आणि विचारांची पातळी लक्षात येते. पवारांचे वय, अनुभव अन् राजकीय कारकीर्द पाहता पडळकर हे डासाएवढेही नाहीत. डास मारायला कुणी बंदूक वापरत नाही. त्याला हीटचा फवारा पुरेसा असतो, असे गोटे यांनी म्हटले आहे.

Leave a Comment