अहमदनगर – गर्भलिंग चाचणीसंदर्भात केलेल्या वक्तव्याबाबत प्रसिद्ध किर्तनकार निवृत्ती महाराज इंदुरीकर यांनी एका प्रसिद्धी पत्रकाद्वारे जाहीर माफी मागितली आहे. किर्तनकार इंदुरीकर महाराज यांनी एका कीर्तनादरम्यान सम तिथीला स्त्री संग केल्यास मुलगा होतो आणि विषम तिथीला स्त्री संग केल्यास मुलगी होते, असे वादग्रस्त वक्तव्य केले होते. त्यांच्यावर या वक्तव्यानंतर सोशल मीडियावर टीकेची झोड उडाली होती. आता या वादावर इंदुरीकर महाराजांनी जाहीर दिलगिरी व्यक्त करत पडदा टाकण्याचा प्रयत्न केला आहे.
इंदुरीकर महाराजांच्या माफीनाम्यातील मजकूर जशाचा तसा
महाराष्ट्रातील तमाम वारकरी, कथाकार, किर्तनकार, शिक्षक-शिक्षिका, डॉक्टर, वकील व मातासमान असलेला तमाम महिलावर्ग. आज गत आठ दिवसांपासून माझ्या किर्तणरूपी सेवेतील ज्या वाक्यामुळे सोशल मीडिया व इलेक्ट्रॉनिक मीडियासह इतर समाजमाध्यमांत माझ्या अभ्यासानुसार मी केलेल्या वक्तव्याचा विपर्यास केला जात आहे.
तरी मी वारकरी सांप्रदायाचा पाईक असून, मी माझ्या २६ वर्षांच्या किर्तनरूपी सेवेत समाज प्रबोधन, समाज संघटन, अंधश्रद्धा निर्मूलन व विविध जाचक रूढी-परंपरा यावर भर दिला होता. माझ्या किर्तनरूपी सेवेतील या वाक्याने कुणाच्या भावना दुखावल्या गेल्या असतील तर मी दिलगिरी व्यक्त करतो. माझ्यावरील प्रेम वृद्धींगत व्यावे ही सदिच्छा!, असे पत्रक इंदुरीकर महाराज यांनी काढले आहे. महाराष्ट्र भूषण समाज प्रबोधनकार ह.भ.प. निवृत्ती महाराज देशमुख (इंदूरीकर) असा शिक्काही त्याखाली आहे आणि त्यावर इंदुरीकर महाराजांची स्वाक्षरी आहे.