मुंबई – राज्यात महाविकास आघाडीचे सरकार स्थापन होण्यापूर्वी भाजप आणि शिवसेना युतीची काडीमोड झाल्यानंतर बळी गेलेले माजी केंद्रीय अवजड मंत्री अरविंद सावंत यांचे पुनर्वसन करण्यात आले असून केंद्र सरकारकडे प्रलंबित असलेल्या राज्यातील विविध प्रस्तावांचा पाठपुरावा करण्यासाठी असलेल्या महाराष्ट्र राज्य संसदीय समन्वय समितीच्या अध्यक्षपदी खासदार अरविंद सावंत यांची नियुक्ती करण्यात आली आहे. मंत्रिपदाचा दर्जा त्यांना देण्यात येत आहे.
केंद्रीय अवजड उद्योगमंत्री पदाची जबाबदारी तत्कालीन एनडीए सरकारचा भाग असलेल्या शिवसेनेतील खासदार अरविंद सावंत यांना देण्यात आली होती. सावंत यांनी भाजप-शिवसेनेचा काडीमोड झाल्यानंतर राजीनामा देऊन खासदार राहणेच पसंत केले होते.
राज्यातील संसद सदस्यांची मुख्यमंत्री उद्धव ठाकरे यांच्या अध्यक्षतेखाली बैठक झाली होती. त्यामध्ये केंद्र सरकारकडे प्रलंबित प्रस्तावांबाबत चर्चा झाली होती. वेळोवेळी या प्रस्तावांचा पाठपुरावा करण्यासाठी खासदार अरविंद सावंत यांच्या अध्यक्षतेखाली त्रिसदस्यीय समिती नियुक्त करण्याचा निर्णय घेण्यात आला होता. त्याबाबतचा शासन आदेश निर्गमित करण्यात आला आहे.
नवी दिल्लीतील महाराष्ट्र सदन येथे समितीचे अध्यक्ष सावंत यांचे कार्यालय असेल, कामकाजासाठी आवश्यक सुविधा तसेच अधिकारी, कर्मचारी नवी दिल्लीतील सचिव तथा निवासी आयुक्त, महाराष्ट्र सदन यांच्याकडून त्यांना देण्यात येणार आहेत.