शिर्डी – रिपाइंचे नेते आणि केंद्रीय राज्य मंत्री रामदास आठवले यांनी राष्ट्रवादीचे नेते छगन भुजबळ यांना शिवसेना जर त्यांना पक्षात घेत नसेल तर त्यांनी सरळ रिपाइंत यावे अशी ऑफरच दिली आहे. छगन भुजबळ हे शिवसेनेत प्रवेश करणार म्हणजेच त्यांची घरवापसी होणार अशी चर्चा गेल्या काही दिवसांपासून रंगली आहे. शिवसेनेत जाणारे छगन भुजबळ कोणीतरी वेगळे असतील असे म्हणत काही दिवसांपूर्वीच या चर्चांना स्वतः भुजबळांनीच पूर्णविराम दिला होता. पण या सगळ्या चर्चांना उधाण विधानसभा निवडणूक तोंडावर आल्याने पुन्हा एकदा आले आहे. रामदास आठवले यांनी याच पार्श्वभूमीवर भुजबळांना रिपाइंची ऑफर दिली आहे.
जर छगन भुजबळ यांना शिवसेना पक्षात घेत नसेल तर त्यांनी रिपाइंत यावे, असे रामदास आठवले यांनी म्हटले आहे. ज्यांना सेना-भाजपचा पर्याय निवडायचा नाही, त्यांनी रिपाइंचा पर्याय निवडावा असेही आठवलेंनी म्हटले आहे. बहुजन समाजाचे छगन भुजबळ हे मोठे नेते आहेत, फार पूर्वीपासून त्यांचे आणि माझे संबंध चांगले आहेत. शिवसेना त्यांना पक्षात घेत नसेल तर त्यांनी रिपाइंत यावे ते आरपीआयमध्ये आले तर आरपीआयची ताकद वाढेल असेही आठवले यांनी म्हटले आहे. शिर्डीमध्ये पत्रकारांशी संवाद साधत असताना रामदास आठवले यांनी छगन भुजबळ यांना ही ऑफर दिली आहे. आता यावर छगन भुजबळ काही प्रतिक्रिया देणार का? हे पाहणे महत्त्वाचे ठरणार आहे.