नवी दिल्ली – अमेरिकेतील जगप्रसिद्ध टाइम मासिकाच्या मुखपृष्ठावर पंतप्रधान नरेंद्र मोदी हे झळकले असून पण मोदींचा मुखपृष्ठावरील फोटो हा यावेळी सकारात्मक लेखासंदर्भात नसून ‘टाइम’ने दुफळी निर्माण करणारा भारतातील प्रमुख नेता असा पंतप्रधान नरेंद्र मोदींचा उल्लेख केला आहे. मोदींसंदर्भात लेख लिहिणाऱ्या आतिश तासीर यांनी निवडणुकीच्या पार्श्वभूमीवर मोदी हिंदुत्वावर आधारित राजकारण करत असल्याने देशात ध्रुवीकरण झाल्याचा आरोप केला आहे.
भारताचे लोकप्रियतेमुळे कोलमडलेली लोकशाही म्हणून नाव घेता येईल, या वाक्याने लेखाची सुरुवात झाली आहे. मोदी सरकारला जगातील सर्वात मोठी लोकशाही आणखीन पाच वर्ष देईल का? अशा मथळ्याखाली टाइम मासिकाच्या आशिया आवृत्तीमध्ये कव्हरस्टोरी छापण्यात आली आहे. तुर्की, ब्राझील, ब्रिटन आणि अमेरिकेप्रमाणेच भारतातही लोकशाही मुल्यांपेक्षा एखाद्याची लोकप्रियता अधिक वाढल्याचे दिसत आहे, असे लेखकाने या लेखामध्ये म्हटले आहे. लोकप्रियतेमुळे या आधी दुर्लक्षित केल्या जाणाऱ्या बहुसंख्याकांच्या भावनांना वाचा फोडण्याचे काम झाले आहे. पण त्याच वेळी यामुळे देशातील वातावरण निकोप व उत्साहवर्धक राहिले नसल्याचेही तासीर यांनी या लेखात म्हटले आहे.
२०१४ च्या निवडणुकांनंतर देशामध्ये अनेक बदल झाल्याचे मोदींवर टिका करणाऱ्या या लेखामध्ये म्हटले आहे. त्याचबरोबर लेखकाने एक राष्ट्र म्हणून भारताची वैशिष्ट्ये, भारताचे निर्माते, भारतातील अल्पसंख्यांक आणि देशातील संस्थांचा कारभार असे सर्वकाही विस्कळीत पद्धतीने मांडण्यात येत असल्याची टिका केली आहे. स्वतंत्र भारताने मिळलेल्या सहिष्णुता, उदारमतवादी धोरण, स्वतंत्र प्रसारमाध्यमे यासारख्या गोष्टींही एखाद्या कटाचा भाग असल्याप्रमाणे २०१४ च्या निवडणुकांनंतर भासवले जात असल्याची टीका तासीर यांनी केली आहे.
नरेंद्र मोदी हे २००२ च्या गुजरात दंगलीनंतर शांत राहण्याचा निर्णय घेतल्याने ते एका ठराविक गटाच्या बाजूने झाले, असेही लेखक तासीर यांनी आपल्या लेखात म्हटले आहे. मोदी एक बदल घडवणारा नेता असाही लेख तासीर यांच्या लेखाबरोबरच याच आवृत्तीमध्ये इयन बेरीमेर यांनी लिहिला आहे. मासिकाच्या मुखपृष्ठावर या लेखाचा उल्लेखही करण्यात आला आहे.
टाइम मासिकाची मोदींबद्दलची मागील काही वर्षांमध्ये भूमिका मोठ्या प्रमाणात बदलल्याचे पहायला मिळाले आहे. २०१४, २०१५ आणि २०१७ साली पंतप्रधान नरेंद्र मोदींचा समावेश ‘जगातील १०० सर्वात प्रभावशाली व्यक्ती’च्या यादीमध्ये करण्यात आला होता. मात्र २०१९ साली मोदींचा या यादीमध्ये समावेश करण्यात आला नाही.