आहारामध्ये ओमेगा ३ ची कमतरता असल्याने असे दिसून येतात परिणाम

ओमेगा ३ फॅटी अॅसिड्स आपल्या आरोग्याच्या दृष्टीने अतिशय महत्वाची आहेत. मेंदूचे आणि शरीरातील कोशिकांचे कार्य सुरळीत चालू राहावे यासाठी ओमेगा ३ अतिशय महत्वाची आहेत. तसेच शरीरामध्ये असलेले कोणत्याही प्रकारचे इनफ्लेमेशन आणि हृदयरोग, कर्करोग, संधिवात यांसारख्या विकारांपासून शरीराचे संरक्षण करण्याचे काम ओमेगा ३ फॅटी अॅसिड्स करीत असतात. शरीरामध्ये वारंवार होणारी इन्फेक्शन दूर ठेऊन शरीराची रोगप्रतिकारशक्ती वाढविण्याचे काम ओमेगा ३ करतात. साल्मन, ट्युना, मॅकरेल आणि सार्डीन्स ह्या माशांमध्ये ओमेगा ३ मुबलक मात्रेमध्ये आढळतात. तसेच जवस, चिया सीड्स, पालक, राजमा, सोयाबीन, फ्लॉवर, ब्रोकोली या भाज्यांमध्ये ही ओमेगा ३ भरपूर प्रमाणात आहेत. त्यामुळे ओमेगा ३ ची शरीरातील कमतरता दूर करण्यासाठी ह्या अन्नपदार्थांचा आपल्या आहारामध्ये समावेश करणे आवश्यक आहे.

जर ओमेगा ३ ची कमतरता असेल, तर त्याचे अनेक दुष्परिणाम दिसून येऊ लागतात. ज्या व्यक्तींना हृदयरोग आहे, त्यांच्यामध्ये एल डी एल कोलेस्टेरोलची पातळी वाढलेली आढळून येते. ओमेगा ३ जर अपुऱ्या प्रमाणात घेतले जात असेल, तर ही पातळी वाढत राहते. ह्या उलट ओमेगा ३ असलेल्या अन्नपदार्थांचा आहारामध्ये समावेश केला, तर ही पातळी घटू लागते. तसेच ह्याच्या सेवनाने रक्तदाब नियंत्रित राहण्यास मदत होते. त्याचप्रमाणे हृदयाच्या धमन्यांमधील अडथळे दूर होण्यास मदत होते.

ओमेगा ३ चे प्रमाण आहारामध्ये आवश्यकतेपेक्षा कमी असेल, तर सांधेदुखी सुरु होऊ शकते. किंबहुना ज्यांना सांधेदुखीचा त्रास आहे, त्यांनी आहारामध्ये ओमेगा ३ चे प्रमाण वाढविल्याने त्यांची सांधेदुखी कमी झाल्याचे आढळून आल्याचे तज्ञांचे म्हणणे आहे. ओमेगा ३ च्या सेवानाने सांध्यांना आलेली सूज कमी होऊन सांध्यांची हालचाल पूर्ववत आणि वेदनारहित होण्यास मदत होते. त्याचप्रमाणे मेंदूचे कार्य सुरळीत चालावे यासाठी देखील ओमेगा ३ची आवश्यकता आहे.

ओमेगा ३ ची कमतरता असल्याने त्याचा परिणाम मेंदूच्या कार्यावर आणि परिणामी स्मरणशक्तीवर होऊ शकतो. वृद्ध व्यक्तींना स्मृतीभ्रंश झाल्यास ओमेगा ३ च्या सेवनाने स्मृतिभ्रंश होण्याचे प्रमाण पुष्कळ अंशी कमी होत असल्याचे आढळून आले आहे. तसेच दृष्टीदोष कमी करण्याकरिता ही ओमेगा ३ चे सेवन करणे फायदेशीर आहे. विशेषतः ज्या व्यक्तींना ग्लॉकोमा आहे त्यांच्यासाठी ओमेगा ३ विशेष फायद्याचे आहे. त्वचेच्या आरोग्यासाठी ओमेगा ३ अतिशय लाभदायक आहेत. ह्यांच्या कमतरतेमुळे त्वचा रुक्ष, कोरडी दिसू लागते. ओमेगा ३ मुळे शरीरातील टॉक्झिन्स बाहेर पडण्यास मदत होऊन त्वचेचे आरोग्य सुधारते.