नवी दिल्ली – आयडीबीआय बँकेकडून आंध्र प्रदेश आणि तेलंगणामधील पाच शाखांमधून ७७२ कोटी रुपयांचा घोटाळा झाल्याचे सांगण्यात आले आहे. २००८-०९ ते २०१२-१३ या आर्थिक वर्षांदरम्यान यातील काही कर्जे मत्स्यपालन क्षेत्रासाठी वितरित करण्यात आली होती. अस्तित्वात नसणा-या तलावांमध्ये बनावट कागदपत्रांच्या साहाय्याने बँकेची फसवणूक करण्यात आली आहे.

कर्जासाठी गहाण ठेवण्यात आलेल्या संपत्तीचे मूल्य अधिक सांगण्यात आले होते. पीएनबीप्रमाणे या घोटाळय़ातही बँकेतील दोन अधिका-यांचाही हात असल्याचे समोर आले. यापैकी एक निवृत्त झाला असून दुस-याला बडतर्फ करण्यात आले. सीबीआय या प्रकरणाचा तपास करत असून दोन गुन्हे दाखल करण्यात आलेत. बुधवारी बँकेचा समभाग ५ टक्क्यांनी घसरत बंद झाला. यापूर्वी पंजाब नॅशनल बँक आणि भारतीय स्टेट बँकेत घोटाळा झाल्याचे उघडकीस आले होते.