देशातील लोकप्रिय मोटरसायकल कंपनी रॉयल एनफिल्डच्या स्टील्थ ब्लॅक क्लासिक ५०० या १५ खास लिमिटेड बाईक्स सेल सुरू होताच अवघ्या १५ सेकंदात विकल्या गेल्याचे जाहीर केले गेले आहे. या बाईक्सची किंमत १ लाख ९० हजार रूपये होती व ऑनलाईन सेलमध्ये २ हजार ग्राहकांनी त्यासाठी मागणी नोंदविली होती.
या बाईक्स खास होत्या. म्हणजे या बाईक्स देशातील ब्लॅक कॅट एनएसजी कमांडोंच्या खास मोहिमेचा एक भाग होत्या. एनएसजीच्या १५ बहादूर कमांडोनी या बाईक्सवरून देशात ८ हजार किमीचा प्रवास केला होता. या मोहिमेच्या उद्देश दहशतवादविरोधात नागरिकांत जागृती करणे व सैन्य दलाला या साठी नागरिकांकडून सहकार्य हवे असल्याचे सांगणे हा होता. दहशतदवाद संपविण्याची जबाबदारी जवानांबरोबर नागरिकांवरही आहे असा संदेश यातून दिला गेला होता. या बाईक्सवर एनएसजीचे चिन्ह कोरले गेले आहे.