मुंबई – मुंबईच्या डी. एन. नगर भागात गुरुवारी रात्री उशिरा देवेन देसाई या व्यावसायिकाची गोळ्या झाडून हत्या करण्यात आली. यावेळी झालेल्या हल्ल्यात अन्य एक जखमी झाला असून त्याच्यावर कुपर रुग्णालयात उपचार सुरू आहेत. हत्ये मागचे कारण अद्याप स्पष्ट होऊ शकलेले नाही. रात्री आठ वाजण्याच्या सुमारास ही घटना घडली. व्यवसायाने इव्हेंट मॅनेजर असलेल्या देवेन देसाई याने दिवाळीच्या निमित्ताने आपल्या मित्रांसाठी घरी पार्टी ठेवली होती. ही पार्टी सुरू असताना अचानक देवेनवर गोळीबार झाला. त्यानंतर त्यांच्यावर चाकूचे वार करण्यात आले. यात त्याचा जागीच मृत्यू झाला. यावेळी पार्टीत असलेला देवेनचा मित्र संदीप कावा यालाही गोळी लागली. तो जखमी झाला असून त्याच्यावर उपचार सुरू आहेत. पोलिसांना देवेनच्या मित्रांवरच संशय असून या प्रकरणी हत्येचा गुन्हा नोंदविण्यात आला आहे.