प्रेमाला वयाचे, भाषेचे, जात पातीचे बंधन नसते अशी म्हण आहे. ही म्हण झारखंडमधील तारा टूडू याने खरी करून दाखविली आहे. तारा तब्बल १०६ वर्षांचे वृद्ध आहेत आणि त्यांनी त्यांची २० वर्षे प्रेमिका असलेली ४५ वर्षीय बहामुनी मुर्मू हिच्याशी मंगळवारी विवाह केला आहे. या अनोख्या विवाहाला ताराच्या नातवंड पतवंडांसह सर्व कुटुंबिय हजर होतेच पण लग्नाविषयी औत्सुक्य वाटल्याने आसपासच्या गावातूनही शेकडो लोक हे लग्न पाहण्यासाठी जमले होते असे समजते.
तारा तांत्रिक आहे. गेली वीस वर्षे तारा आणि बहामुनी यांचे प्रेम आहे. बहामुनी ताराच्याच कुटुंबात राहते आणि तिला चार मुलेही झाली आहेत. इतकी वर्षे प्रतीक्षा केल्यानंतर अखेर बहामुनीशी लग्न करण्यास ताराने संमती दिली आणि तशी परवानगी गावच्या मुखियाकडे मागितली. परवानगी नंतर हा विवाह ग्रामसचिव वीर मरांडी, सामाजिक कार्यकर्ते सियाराम सोनेन, टूडूच्या कुटुंबातील माणसे आणि शेकडो अन्य गावकरी यांच्या उपस्थितीत संपन्न झाला असे समजते.