मुंबई – आगामी लोकसभा निवडणुकीसाठी काँग्रेस पक्षाने प्रचार समितीची घोषणा केली असून, यामध्ये महाराष्ट्रातील चार नेत्यांचा समावेश आहे. काँग्रेसचे राष्ट्रीय महासचिव जनार्दन द्विवेदी यांनी नवी दिल्लीत या समितीची घोषणा केली. निवडणूक प्रचार समितीच्या अध्यक्षपदाची जबाबदारी काँग्रेस अध्यक्षा सोनिया गांधी यांच्याकडे राहणार असून, काँग्रेस उपाध्यक्ष राहुल गांधी यांना सदर समितीचे उपाध्यक्ष करण्यात आले आहे.
पंतप्रधान डॉ. मनमोहन सिंग, केंद्रीय मंत्रिमंडळातील अनेक वरिष्ठ मंत्री तसेच अखिल भारतीय काँग्रेस कमिटीचे सरचिटणीस व महाराष्ट्राचे प्रभारी मोहन प्रकाश यांच्यासह अनेक प्रमुख राष्ट्रीय नेते या समितीचे सदस्य असतील. या समितीमध्ये केंद्रीय गृहमंत्री सुशीलकुमार शिंदे, अखिल भारतीय काँग्रेस कमिटीचे सरचिटणीस गुरूदास कामत व मुकूल वासनिक यांच्यासह महाराष्ट्र प्रदेश काँग्रेस कमिटीचे प्रवक्ते व अखिल भारतीय काँग्रेस कमिटीच्या मीडिया पॅनेलचे सदस्य अनंत गाडगीळ या चार महाराष्ट्रातील नेत्यांचा समावेश करण्यात आला आहे.