पणजी – एका महिला पत्रकाराचे लैंगिक शोषण केल्याप्रकरणी तेहलका मासिकाचा संस्थापक संपादक तरुण तेजपाल याला गोवा येथील न्यायालयाने १२ दिवसांची न्यायालयीन कोठडीची शिक्षा सुनावली आहे. भारतीय दंडविधानाच्या विभिन्न कलमांतर्गत तेजपाल याच्यावर गुन्हा दाखल करण्यात आला असून आज (बुधवार) त्याच्या पोलिस कोठडीची मुदत संपणार होती. या पार्श्‍वभूमीवर न्यायालयाने त्याला न्यायालयीन कोठडीत ठेवण्याचा आदेश दिला. गोव्यामधील एका पंचतारांकित हॉटेलमध्ये ७ व ८ नोव्हेंबर रोजी तेजपाल याने आपले लैंगिक शोषण केल्याचा आरोप त्यावेळी तेहलकामध्ये काम करत असलेल्या महिला पत्रकाराने केला होता.

पोलिसांनी तेजपाल याची चौकशी सुरु केली असून न्यायालयासमोर त्याचा गुन्हा सिद्ध करण्यासाठी आवश्यक असणारा पुरावा गोळा करण्याचे आव्हान त्यांच्यासमोर आहे. महिला पत्रकार शोषण प्रकरणाचा तपास योग्य दिशेने सुरू असून, आम्ही तेजपालची सविस्तर चौकशी करीत आहोत. तो आम्हाला सहकार्य करीत आहे, अशी माहिती तपास करणार्‍या गुन्हे शाखेच्या पथकामधील एका ज्येष्ठ अधिकार्‍याने यासंदर्भात दिली आहे. तेजपाल प्रकरणाचा तपास पोलिस उपअधीक्षक सुनीता सावंत करीत असून, आरोपीने दिलेल्या सर्व जबाबाच्या नोंदी ठेवण्यात आल्या आहेत.