नाशीक- मातीचा ढिगारा कोसळल्याने पाच अभियंत्यांचा मृत्यू झाला होता. ही घटना देवळा तालुक्यातील चिंचवे येथे पाझर तलावाची जलवाहिनी दुरुस्तीसाठी खोदकाम सुरू असताना सोमवारी घडली होती. या प्रकरणाची उच्चस्तरिय चौकशी करण्याचे आदेश मंगळवारी राज्याचे सार्वजनिक बांधकाम मंत्री छगन भुजबळ यांनी दिले आहेत. त्यांच्या कुटुंबीयांना प्रत्येकी दहा लाख रुपयांची मदत जाहीर केली.
या घटनेत एच. एम. पाटील (रा. शहादा), एस. जी. सोनवणे (दरसवाडी ता. दिंडोरी), पी. यू. सूर्यवंशी (चाळीसगाव), ए. के. शेवाळे (टेहेरे, ता. मालेगाव), व्ही. एच. आहेर या अभियंत्यांचा मृत्यू झाला आहे. त्यामुळे घडलेल्या सर्व प्रकाराची उच्चस्तरीय चौकशी करून त्वरीत अहवाल सादर करण्याचे आदेश भूजबळ यांनी दिले आहेत.
चिंचवे येथे लघुपाटबंधारे विभागांतर्गत दहा वर्षांपूर्वी बांधलेल्या पाझर तलावातून पाणी सोडण्यात येणारी जलवाहिनी नादुरुस्त झाली होती. दुरुस्तीच्या कामासाठी बंधा-यापासून सुमारे ५० फूट खोल चारी खोदण्यात आली होती. त्याची पाहणी करण्यासाठी लघुपाटबंधारे विभागाचे उपअभियंता एच. एम. पाटील, एस. जी. सोनवणे, शाखा अभियंता पी. यू. सूर्यवंशी, ए. के. शेवाळे, व्ही. एच. आहेर हे चारीत उतरले असता अचानक मातीचा ढिगारा कोसळला. या ढिगा-याखाली हे सर्व जण गाडले गेले. यंत्राच्या साह्याने ढिगारा उपसेपर्यंत दोन अभियंत्यांचा जागीच मृत्यू झाला, तर इतर तिघांचा उपचारासाठी रुग्णालयात नेताना मृत्यू झाला.