भट्ट कॅम्पच्या र्मडर-३ या चित्रपटात आवश्यकतेपेक्षा जास्त अंगप्रदर्शन व भडक दृश्ये देऊनही आपल्या कारकीर्दीची दुकानदारी फारशी चालत नसल्याचे पाहून आदिती राव हैदरीने आता पुन्हा आपली प्रतिमा बदलण्याचा निर्णय घेतला आहे. विश्‍वास बसणार नाही, पण नाजूक बांध्याची आदिती आता अँक्शन भूमिका साकारण्याची इच्छा ठेवून असून त्यासाठी ती अशाच एखादी कथा व चित्रपटाचा शोध घेत आहे. राकेश ओमप्रकाशच्या एका चित्रपटात साध्यासरळ तरुणीची भूमिका साकारत आदितीने आपल्या कारकिर्दीची सुरुवात केली होती. मात्र त्यास फारसे यश न मिळाल्याने आपली प्रतिमा बदलण्याचा निर्णय घेत सुधीर मिश्राच्या यह साली है जिंदगी या चित्रपटात ती अतिशय ग्लॅमरस व बोल्ड रूपात प्रेक्षकांसमोर आली होती. या चित्रपटाचा नायक अरुणोदय सिंहसोबत तिने बेसुमार चुंबनदृश्ये दिली होती, पण हा चित्रपटही बॉक्स ऑफिसवर दणकून आपटला.
पहिल्या दोन्ही चित्रपटांनी अपेक्षाभंग केल्याने आदितीने भट्ट कॅम्पच्या दिशेने धाव घेत मोठय़ा अपेक्षेने र्मडर-३ हा चित्रपट स्वीकारला. विवाहबाहय़ संबंधांवर आधारित असलेल्या या चित्रपटातही आदितीने रणदीप हुड्डासोबत जबरदस्त बोल्ड दृश्ये दिली, पण या चित्रपटानेही तिचा भ्रमनिरस केला. र्मडरने मल्लिका शेरावतला जशी लोकप्रियता मिळवून दिली त्याच्या एक टक्काही लाभ आदितीला मिळाला नाही. म्हणूनच आता आदितीने पुन्हा एकदा आपल्या प्रतिमेतून बाहेर पडत अँक्शन रूप धारण करताना दिसणार आहे. यापुढे भडक भूमिका स्वीकारण्याऐवजी एखाद्या अँक्शन चित्रपटात नशीब आजमावण्याचे तिने ठरविले आहे. आता तिचे हे आक्रमक रूप तिला किती फलदायी ठरते ते दिसेलच. आदिती सध्या अक्षयकुमारसोबत बॉस नामक चित्रपटात काम करीत आहे. अँक्शनपट असलेल्या बॉसमध्ये तिची स्टंटबाजी पाहण्यास मिळणार आहे.