नवी दिल्ली, ९ ऑगस्ट-अभिनेत्री रेखा बुधवारी विद्यार्थ्यांच्या भूमिकेत होते! त्यांचे शिक्षक होते राष्ट्रपती प्रणव मुखर्जी. राज्यसभेवर नियुक्ती झालेल्या सचिन आणि रेखा यांनी संसदेच्या पावसाळी अधिवेशनाच्या पहिल्या दिवशी राष्ट्रपती भवनात जाऊन मुखर्जी यांची भेट घेऊन त्यांच्याकडून संसदीय प्रक्रियांची सविस्तर माहिती घेतली.
नुकतेच राष्ट्रपतिपदी निवडून आलेले मुखर्जी पट्टीचे संसदपटू म्हणून प्रसिद्ध आहेत. त्यांनी रेखा आणि सचिनला भारतीय राज्यघटनेतील काही ठळक मुद्दे समजावून दिले, असे राष्ट्रपती भवनाचे माध्यम सचिव वेणू राजामणी यांनी सांगितले.
मुखर्जी यांची भेट खूप काही शिकवणारी होती, असे सचिनने नमूद केले. रेखाने तर हा ’ आशीर्वाद ’ च होता, अशी भावना व्यत्त* केली.
राज्यसभेचा अनुभव नवीन आहे, असे सचिनने राज्यसभेत प्रथमच हजेरी लावल्यानंतर पत्रकारांना सांगितले. राज्यसभेतील खासदारांनी सचिन आणि रेखाचे जोरदार स्वागत केले. आसाममधील हिंसाचार आणि उत्तर प्रदेशातील डॉ. बाबासाहेब आंबेडकर यांच्या पुतळ्यांची अवहेलना यांवरून खासदारांनी गोंधळ घातल्यामुळे
राज्यसभेचे कामकाज लगेचच तहकूब करण्यात आले.
अवघ्या देशासाठी स्टार असलेले सचिन तेंडुलकर आणि रेखा राज्यसभेतही आकर्षणाचे केंद्र ठरले. बहुतेक खासदार माना वळवून या दोघांकडे बघत होते. मोतिया रंगाची साडी नेसलेली रेखा अनू आगा आणि जावेद अख्तर यांच्या मध्ये बसली होती, तर सचिन टी. के. रंगराजन यांच्या शेजारी बसून कामकाजाची प्रक्रिया समजून घेत होता.
