जगप्रसिद्ध अॅपलला त्यांच्या आयपॅड ट्रेडमार्कच्या मालकीसाठी अखेर फडतूस चीनी कंपनीशी तब्बल सहा कोटी अमेरिकन डॉलर्स मोजून समझोता करण्याची वेळ आली आहे. अॅपल आणि चीनच्या प्रोव्ह्यू या कंपनीत हा सेटलमेंट करार आज पार पडला. या चीनी कंपनीने अॅपलच्या टॅबलेट विक्रीवर चीनमध्ये बंदी आणण्याचे पाऊल उचलल्याने अॅपलने हा सौदा केला असे सांगण्यात येत आहे. आता प्रीव्ह्यू कंपनी अॅपलला आयपॅड ट्रेडमार्कचे हक्क देणार आहे.
याविषयीची अधिक माहिती अशी की आयपॅड ट्रेडमार्कवर नक्की हक्क कोणाचा याचा वाद अॅपल आणि चीनी कंपनी प्रीव्ह्यू यांच्यात सुरू होता. चीनसाठी हा ट्रेडमार्क आपण प्रीव्ह्यू कडून २००९ सालीच विकत घेतल्याचा अॅपलचा दावा होता मात्र संगणक व डिस्प्ले व्हेंडॉर असलेल्या प्रीव्ह्यू कंपनीने हे हक्क अॅपलला कधीच विकलेले नाहीत असा दावा चीनी न्यायालयात दाखल केला. ही कंपनी सध्या दिवाळखोरीच्या उंबरठ्यावर उभी असून त्यांनी आठ बँकांकडून बरेच मोठे कर्ज घेतले आहे. त्यामुळे अॅपलने ट्रेडमार्क हक्कांसाठी ४०० मिलीयन डॉलर्स द्यावेत अशी या कंपनीने मागणी केली होती तसेच स्थानिक अधिकार्यांच्या मदतीने अॅपलच्या टॅबलेट विक्रीवरही बंदी आणली होती.
प्रीव्ह्यूने कर्ज घेतलेल्या आठ बँकांच्या सल्लागार समितीवर असलेल्या ली सू यांनी सुरवातीला अॅपलने अगदी किरकोळ किमतीत आयपॅड ट्रेडमार्क विकत घेण्याचा प्रयत्न केला पण वेळ गेला तशी त्यांची किंमत वाढली असे सांगितले. अॅपलचा सीइओ टीम कुक याने मार्चमध्ये चीनला येऊन तेथील सरकारी अधिकार्यांची भेट घेतली होती असेही त्यांनी सांगितले.
