नागपूर, दि. २० – भारत हेवी इलेक्ट्रॉनिक्स कंपनी साकोलीजवळ सौर ऊर्जानिर्मितीसाठी लागणार्या फोटो व्होल्टाईक सेल तयार करणारा तीन हजार कोटी रुपये गुंतवणुकीचा प्रकल्प उभारणार येणार आहे. यातील पहिल्या टप्प्यात एक हजार कोटी रुपयांच्या फॅब्रिकेशनच्या प्रकल्पाची निर्मिती केली जाईल. विदर्भातील या गुंतवणुकीने मोठ्या प्रमाणावर रोजगाराच्या संधी उपलब्ध होतील.
केंद्रीय अवजड उद्योग मंत्री प्रफुल्ल पटेल यांच्या पुढाकाराने चार हजार कोटी रुपयांचा हा प्रकल्प उभारण्यासाठी साकोलीजवळ महामार्गावर ५०० एकर कोरडवाहू जमीन घेण्यात येणार आहे. महाराष्ट्र औद्योगिक विकास महामंडळामार्फत जमिनीसाठी शेतकर्यांशी वाटाघाटी करून भूसंपादन करण्यात येत आहे. भेलचा त्रिची येथे असलेला फॅब्रिकेशन प्रकल्प लहान असल्याने तेथील यंत्रसामुग्री साकोलीजवळ स्थानांतरीत करण्यात येईल. पहिल्या टप्प्यात उभारण्यात येणार्या या प्रकल्पात एक हजार कोटी रुपये गुंतवणूक अपेक्षित आहे. यानंतर दुसर्या टप्प्यात फोटो व्होल्टाईक सेल निर्मितीचा प्रकल्पाचे काम सुरू होईल. देशात पहिल्यांदाच सौर ऊर्जा निर्मितीसाठी लागणार्या उपकरणाचे उत्पादन करण्यात येणार आहे, असे प्रफुल्ल पटेल यांनी भंडारा येथे पत्रकारांशी बोलताना सांगितले.
