मुंबई, दि. २९ – सार्वजनिक क्षेत्रातील तेल वितरक कंपनी असलेल्या इंडियन ऑइल कॉर्पोरेशन ( आय ओ सी) ला जानेवारी ते मार्च २०१२ या तिमाहीत १२ हजार ६७० कोटी ४३ लाख रूपयांचा नफा झाला. डिझेल व घरगुती गॅसची सवलतीच्या दरात विक्री करूनही कंपनीला घसघशीत नफा झाला.
गेल्या तिमाहीत झालेल्या नफ्यात या अगोदराच्या वर्षाच्या याच कालावधीच्या तुलनेत तिप्पट वाढ झाली आहे. २०१०-११ च्या याच तिमाहीत कंपनीला ३९०६ कोटी १६ लाख रूपयांचा नफा झाला होता. गेल्या आर्थिक वर्षासाठी डिझेल, केरोसिन व घरगुती गॅससाठी कंपनीला ४५ हजार ४८४ कोटी रूपयांचे अनुदान सरकारकडून मिळाले. मात्र, तरीही या इंधनातून कंपनीला २२.३७ कोटी रूपयांचा तोटा झाला. २०११-१२ या वर्षात कंपनीच्या विक्रीत ३० टक्क्यांची वाढ होऊन, कंपनीने एक लाख २८ हजार ४३३ कोटी ९६ लाख रूपयांचे उत्पन्न मिळविले.
