इस्लामाबाद दि.२४- अमेरिकेच्या सुरक्षा विभागाला पाकिस्तानातील अबोटाबाद येथे लपलेल्या ओसामा बिन लादेनचा शोध घेण्यात सहकार्य करणारे खैबरचे माजी सर्जन जनरल डॉ.शकील अफ्रिदी यांना पाकिस्तानातील न्यायालयाने ३३ वर्षे तुरूंगवासाची शिक्षा ठोठावली असून त्यांच्यावर स्वदेशाशी गद्दारी करण्याचा आरोप ठेवण्यात आला आहे.
या विषयी मिळालेल्या माहितीनुसार डॉ.शकील यांनी अबोटाबाद येथे बनावट लसीकरण केंद्र सुरू केले होते. हेपिटायटिस बीच्या लसीसाठी हे केंद्र सुरू करण्यात आले होते व त्यानुसार या केंद्रातील नर्सेस प्रत्येक घरी जाऊन त्यासंबंधीची माहिती देत होत्या. प्रत्यक्षात प्रत्येक घरात जाण्यामागे ओसामा कुठे आढळतो काय याचा तपास घेतला जात होता. दहशतवादी ओसामाला शोधण्याच्या अमेरिकेच्या मोहिमेला या कृतीने डॉ.शकील मदत करत होते.
डॉ.शकील यांच्या तुरूंगवासाच्या शिक्षेमुळे आता अमेरिका आणि पाकिस्तान यांच्यातील ताणलेल्या संबंधांवर अधिक प्रकाश पडत आहे. अमेरिकेच्या सुरक्षा विभागातील अधिकार्यांनी डॉ.शकील यांच्यावर कोणतीही कारवाई केली जाऊ नये यासाठी पाकिस्तानवर बरेच वेळा दबाब टाकण्याचा प्रयत्न केला होता. मात्र अमेरिकेचे राष्ट्राध्यक्ष बराक ओबामा यांनी शिकागो येथील नाटो बैठकीत पाकिस्तानचे राष्ट्राध्यक्ष झरदारी यांची भेट घेण्यास नकार देताच दुसरे दिवशीच डॉ.शकील यांना तुरूंगवासाची शिक्षा सुनावण्यात आली आहे. यामुळे पाकिस्तानच्या टीकाकारांना पुन्हा एकदा पाकिस्तानच्या मिलीटरी विभागातच ओसामा कसा राहू शकला आणि अमेरिकेच्या सील कमांडोंनी त्याला कसा हुडकला याबाबत वकतव्य करण्याची संधी प्राप्त झाली आहे.
अमेरिकेचे सुरक्षा सचिव पेनाटा यांनी डॉ.शकील यांच्या अटकेविषयी काळजी व्यक्त केली असून जागतिक दहशतवाद्याच्या विरोधात धैर्याने साथ देणार्या कोणत्याही देशाच्या नागरिकाविरोधात अशी कृती करणे मोठी चूक असल्याचे म्हटले आहे. डॉ.शकील यांनी अमेरिकेच्या शोध मोहिमेत सहकार्य केले असले तरी त्यांच्या प्रयत्नांमुळे ओसामा सापडलेला नाही तर अमेरिकेच्या गुप्तवार्ता विभागाची कामगिरीच त्यासाठी उपयुक्त ठरली असल्याच्या घटनेकडेही त्यांनी यावेळी मुद्दाम लक्ष वेधले आहे.
