इंग्लंडला भारताविरुद्ध पाच सामन्यांची कसोटी मालिका खेळायची आहे. या मालिकेपूर्वी भारत अ आणि इंग्लंड लायन्स संघ कसोटी सामने खेळत आहेत. अहमदाबादच्या नरेंद्र मोदी स्टेडियमच्या बी ग्राउंडमध्ये ही कसोटी खेळली जात आहे. या सामन्यात विराट कोहलीच्या एका मित्राने शानदार खेळी करत इंग्लंडच्या गोलंदाजांना चपराक दिली आहे. हा खेळाडू आहे रजत पाटीदार. इंग्लंड लायन्स विरुद्ध खेळल्या जात असलेल्या सामन्याच्या दुसऱ्या दिवशी रजतने शानदार शतक झळकावले आहे. त्याच्या खेळीमुळे भारत अ संघाला चांगली सुरुवात आणि मजबूत धावसंख्या गाठण्यात यशस्वी ठरला.

रजतने गेल्या काही वर्षांत देशांतर्गत क्रिकेटमध्ये दमदार फलंदाजी केली आहे. आयपीएलमध्येही त्याने आपली ताकद दाखवून दिली आहे. देशांतर्गत क्रिकेटमध्ये रजत मध्य प्रदेशकडून खेळतो आणि आयपीएलमध्ये तो रॉयल चॅलेंजर्स बंगळुरुकडून खेळतो, ज्यामध्ये विराट कोहली खेळतो. पुन्हा एकदा रजतने आपल्या शतकाने निवडकर्त्यांचे लक्ष वेधून घेतले आहे. या सामन्यात इंग्लंड लायन्सने प्रथम फलंदाजी करत 233 धावा केल्या. भारत-अ ने ही धावसंख्या पार केली आहे.

या सामन्यात रजतने कर्णधार अभिमन्यू ईश्वरनसह डावाची सुरुवात केली आणि संघाला दमदार सुरुवात करून दिली. या दोघांनी पहिल्या विकेटसाठी 73 धावांची भागीदारी केली. 32 धावा करून कर्णधार बाद झाला, तरी रजतने खंबीरपणे उभे राहून धावा सुरूच ठेवल्या. तिसऱ्या क्रमांकावर आलेल्या प्रदोष रंजन पॉलला आपला डाव 21 धावांच्या पुढे नेता आला नाही. रजतला पुन्हा सर्फराज खानची साथ लाभली आणि दोघांनी चांगली भागीदारी रचली. दोघांनी 80 धावा जोडल्या. दरम्यान रजतने आपले शतक पूर्ण केले होते. रजतला कॅलम पार्किन्सनने आपला बळी बनवले. त्याने 141 चेंडूंचा सामना करत 111 धावा केल्या. या फलंदाजाने आपल्या खेळीत 18 चौकार आणि एक षटकार लगावला.

दरम्यान, इंग्लंडविरुद्धच्या पाच सामन्यांच्या कसोटी मालिकेतील पहिल्या दोन सामन्यांसाठी टीम इंडियात निवड झालेला यष्टिरक्षक-फलंदाज केएस भरतनेही शानदार खेळी खेळली आणि अर्धशतक झळकावले. भरतने 92 च्या स्ट्राईक रेटने धावा केल्या. त्याने 69 चेंडूत 64 धावांची खेळी खेळली. या खेळीत त्याने आठ चौकार आणि तीन षटकार मारले. मात्र, सर्फराजला शतक पूर्ण करता आले नाही आणि तो 96 धावांवर बाद झाला. या डावात सरफराजने 110 चेंडूंचा सामना करत 96 धावा केल्या आणि 11 चौकार आणि एक षटकार लगावला.