सोलापूरच्या उद्योगाला चिनी शिष्टमंडळाची भेट

सुमारे नऊ महिन्यांच्या या काळात प्रीसिजनचे चीनमधील कामकाज चांगले सुरू राहिले असून आता तिथे दुसरे यूनिट सुरू होणार आहे. त्या आधी या सरकारी शिष्टमंडळाने सोलापुरात येऊन सोलापूरच्या या कारखान्याची पाहणी केली. शून्य टक्के रिजेक्शन हे या उद्योेगाचे वैशिष्ट्य ठरले असून अनेकदा जपानमधील काही शिष्टमंडळांनी या कारखान्याला भेट दिली आहे. आज हुझाऊ शहराच्या महापौरांसह आठ शहरांच्या प्रमुखांनी सोलापूरला भेट दिली. प्रीसिजन कंपनीच्या कामकाजाची त्यांनी प्रशंसा केली. भारतातून चीनमध्ये उच्च तंत्रज्ञानावर आधारलेला कोणताही उद्योग येत असेल तर त्याचे स्वागत करायला तिथले सरकार उत्सुक आहे अशी माहिती या शिष्टमंडळाचे प्रमुख वु जी पिंग यांनी पत्रकारांशी बोेलताना दिली.

या पत्रकार भेटीच्या वेळी प्रीसिजनचे कॅमशाफ्ट लिमिटेडचे व्यवस्थापकीय संचालक यतीन शहा, सौ. सुहासिनी शहा हे दोघे उपस्थित होते. या शिष्टमंडळाने डॉ. द्वारकानाथ कोटणीस यांच्या निवासस्थानावर उभारण्यात आलेल्या कोटणीस स्मारकालाही भेट दिली. चीनसाठी डॉ. कोटणीस यांनी जे योगदान दिले आहे त्या बद्दल त्यांनी कृतज्ञता प्रकट केली.