पुणे, दि. 7 (प्रतिनिधी) – नववीच्या वर्गापासूनच नियमित विषयांबरोबरच सेंट्रल बोर्ड सेकंडरी एज्युकेशन (सीबीएसई) च्या शाळांमध्ये व्यवसाय प्रशिक्षण अभ्यासक्रमाचाही समावेश करण्यात आला आहे. येत्या शैक्षणिक वर्षांपासून विद्यार्थ्यांना हा विषय घेता येणार आहेत.
सीबीएसईच्या देशभरातील शाळांमध्ये नववीच्या वर्गापासूनच व्यवसाय प्रशिक्षण अभ्यासक्रम सुरू करण्यात येणार आहेत. नॅशनल व्होकेशनल क्वालिफिकेशन फ्रेमवर्कअंतर्गत ही नवी योजना सीबीएसईकडून राबवली जाणार आहे. सीबीएसई शाळांच्या नव्या अभ्यासक्रमानुसार व्यवसाय अभ्यासक्रम सुरू करण्याच्या सूचना शाळांना देण्यात आल्या आहेत. हे अभ्यासक्रम राबविण्यासाठी कौशल्य विकास करणार्या देशभरातील विविध खासगी संस्थांना सहभागी करून घेण्यात आले आहे. या संस्थांच्या सहकार्याने शाळांनी अभ्यासक्रम सुरू करावेत असे निवेदनही सीबीएसईने काढले आहे.