इस्लामाबाद, दि. २० – पाकिस्तानचे पंतप्रधान गिलानींना मंगळवारी सुप्रीम कोर्टाने पदासाठी अपात्र ठरवल्यानंतर पंतप्रधानपदावर आता कोण? याबद्दल चर्चा सुरू झाली होती. यानंतर सत्ताधारी पाकिस्तान पिपल्स पार्टी (पीपीपी) ने मखदूम शहाबुद्दीन यांची पंतप्रधान पदासाठी निवड केल्याचे समजत आहे. पाकिस्तानी मीडियाच्या म्हणण्यानुसार पीपीपीच्या बैठकीत मखदूम शहाबुद्दीन यांच्या नावावर शिक्कामोर्तब झाल्याचे समजत आहे. मखदूम हे सध्या पाक सरकारमध्ये वस्त्र मंत्रालय सांभाळत आहेत. संसदेत आज औपचारिकरित्या मखदूम यांच्या नावाची घोषणा होण्याची शक्यता आहे.

मखदूम शहाबुद्दीन हेही गिलानींप्रमाणेच अध्यात्मिक परिवाराशी संबंधित आहेत. सूफी संत शाह-रुख-ए आलम यांच्या मकबर्‍याचे संरक्षक म्हणून हा परिवार अजूनही ओळखला जातो. २००८ पासून गिलानी यांच्या कार्यकाळात शहाबुद्दीन यांनी वेगवेगळ्या मंत्रालयाचा कारभार उत्तमरित्या सांभाळला आहे. मंगळवारी पाकिस्तान सुप्रीम कोर्टानॅ युसूफ रझा गिलानी यांना अपात्र घोषित करून त्यांना पदावरून पायउतार होण्याचे आदेश दिले आहेत. झरदारी यांच्याविरोधात भ्रष्टाचार उघड करण्यात अपयशी झालेल्या गिलानींना न्यायालयाने दोषी ठरवले आहे. गिलानी यांना अयोग्य ठरवून तशी अधिसूचना लागू करण्याचे आदेशही सुप्रीम कोर्टाने पाकिस्तान निर्वाचन आयोगाला दिले होते.

डिसेंबर २००९ साली सुप्रीम कोर्टाने परवेज मुशर्रफ यांच्या कार्यकाळातील भ्रष्टाचार प्रकरणांमध्ये माफीची याचिका धुडकावून लावली होती. या प्रकरणात भ्रष्टाचारी निर्णयांच्या सहाय्याने झरदारी यांच्यासहीत आठ हजारांहून अधिक लोकांनी सरळसरळ फायदा उठवल्याचे पुढे आले होते. तेव्हापासूनच पाकिस्तानात न्यायव्यवस्था आणि सरकार यांच्यामधील मतभेदाला पासून सुरू झाली होती.