वॉशिंगटन,दि. १६ – अमेरिकेत बाहेरून अनधिकृतरित्या आलेले पण प्रतिभावान असलेल्या तरुणांना आता अमेरिकेबाहेर हाकलले जाणार नाही तर त्यांना कामकाजासाठी व्हिसा देण्यात येईल, अशी माहिती अमेरिकेचे राष्ट्राध्यक्ष बराक ओबामा यांनी दिली. निवडणुकांच्या वर्षात स्थलांतरित नागरिकांच्या प्रश्नासंदर्भात हा निर्णय घेण्यात आला आहे.

ओबामांच्या या घोषणेनंतर लॅटीन नेत्यांनी त्यांचे कौतुक करत या निर्णयाचे स्वागत केले. तर रिपब्लिकन नेत्यांनी नाराजी व्यक्त केली. अशा प्रकारचा व्हिसा देणे म्हणजे अनधिकृतरित्या राहणार्‍यांची शिक्षा माफ केल्या सारखेच, असेही त्यांनी सांगितले.

अमेरिकेच्या गृहमंत्रालयाने दिलेल्या माहितीनुसार ज्या प्रतिभावान तरुणांपासून आपल्या देशाला धोका नाही, असे अनेक जण अनधिकृतरित्या राहत आहेत. त्यांच्या संदर्भात लवकरच काही निर्णय घ्यावा लागेल. त्यानुसार अमेरिकेला ज्यांच्यापासून धोका नाही अशा तरुणांना स्वदेशात न पाठवता त्यांना इथे राहण्यास परवानगी देण्यात येईल. मात्र त्यांना यासाठी तशी अनुमती मागणारा अर्ज दाखल करावा लागणार आहे, अशी माहिती ओबामा यांनी पत्रकारांशी बोलताना दिली.
स्थलांतरीतचे प्रश्न सोडवणे आवश्यक असून ते अधिक निष्पक्ष, अधिक सक्षम आणि न्याय्यरीत्या सोडवले जातील, असे ओबामा यांनी सांगितले.

हा निर्णय म्हणजे एक प्रकारे गुन्ह्याची माफी आहे, असे कोणीही समजू नये. ही सूट मिळाली आहे असा अर्थही कोणी काढू नये किंवा अमेरिकेची नागरिकता मिळवण्याचा हा मार्ग नाही, असे त्यांनी स्पष्ट केले. हा निर्णय कायम असेल असेही नाही.

हे युवक आपल्या आजूबाजूला राहतात, आपल्या शाळेत शिकतात, आपल्या मुलांबरोबर खेळतात. तसेच ते आपल्या राष्ट्रध्वजाविषयी निष्ठा व्यक्त करतात. ते हृदयापासून अमेरिकी आहेत, फक्त त्यांच्याकडे कागद नाही. त्यांना त्यांच्या आई-वडिलांनी येथे आणले आणि जेव्हा त्यांनी नोकरी, शिक्षण तसेच चालक परवाना यासाठी अर्ज केला तेव्हा आपण कागदोपत्री अमेरिकी नसल्याचे त्यांना कळले, असेही ओबामा यांनी सांगितले.