नागपूर, दि.१६ – ज्येष्ठ समाजसेवक कै. बाबा आमटे यांच्या जीवनावर एक चित्रपट तयार करण्यात येत असून त्या चित्रपटामध्ये बाबांच्या भूमिकेत प्रसिद्ध अभिनेता नाना पाटेकर दिसणार आहे. संगीत दिग्दर्शक व निर्माती माधुरी अशीरगडे यांच्या झिरो माईलस्टोन फिल्मच्यावतीने हा चित्रपट तयार करण्यात येत आहे.
नाना पाटेकर यांचे व्यक्तिमत्व बाबांशी मिळतेजुळते असल्याने बाबांच्या भूमिकेसाठी नानाची निवड करण्यात आली आहे. शिवाय नानाचे बाबांशी असलेले भावनिक संबंध यामुळे नाना ही भूमिका नक्की करतील, अशी खात्री माधुरी अशीरगडे यांना आहे. बाबा आमटे यांच्या जीवनाशी संबंधित आनंदवन, सोमनाथ, भामरागड, मुंबई अशा ठिकाणी या चित्रपटाचे चित्रीकरण करण्यात येणार आहे.
