जळगांव दि.२१- जळगांवचे पालकमंत्री आणि राष्ट्रवादी काँग्रेसचे आमदार गुलाबराव देवकर यांना कोट्यावधी रूपयांच्या घरकुल घोटाळा प्रकरणी आज सकाळी बाराच्या सुमारास अटक करण्यात आली. त्यांची वैद्यकीय तपासणी करून दुपारी त्यांना जिल्हा व सत्र न्यायालयात हजर करण्यात येणार असल्याचे जळगांवचे पोलिस निरीक्षक इंगवले यांनी सांगितले.
या विषयी मिळालेल्या माहितीनुसार घरकुल घोटाळा प्रकरणाच्या चौथ्या अटकसत्र प्रकरणी तेवीस जणांना नोटीसा बजावण्यात आल्या होत्या.त्यातच गुलाबराव देवकर यांचाही समावेश होता. मात्र ते मुंबईत असल्याने त्यांना रविवारी नोटीस मिळू शकली नव्हती.पोलिसांनी दिलेल्या सूचनेनुसार सोमवारी म्हणजे आज सकाळी ते जळगांवच्या जिल्हा पेठ पोलिस चौकीत हजर झाले होते. तेथे त्यांची चौकशी केल्यानंतर त्यांना अटक करण्यात आली. गुलाबराव देवकर जळगांव ग्रामीण भागातून राष्ट्रवादीच्या तिकीटावर निवडून आले असून ते राज्याचे कृषी व पर्यटन राज्यमंत्री आहेत.
घरकुल घोटाळा प्रकरणात शनिवारी १० आजी माजी नगरसेवकांना ३० मे पर्यंत न्यायालयीन कोठडी सुनावण्यात आली आहे. याच प्रकरणात आता शिवसेनेत गेलेले माजी मंत्री सुरेश जैन यांनाही अटक करण्यात आली होती मात्र वैद्यकीय कारणांवरून त्यांना जामीन मंजूर करण्यात आला आहे.
