न्यूझीलंडचा महान वेगवान गोलंदाज टीम साऊदीने कसोटी क्रिकेटमधून निवृत्तीची घोषणा केली आहे. 28 नोव्हेंबरपासून इंग्लंडविरुद्धच्या 3 सामन्यांच्या घरच्या कसोटी मालिकेनंतर तो आपल्या कसोटी कारकिर्दीचा शेवट करेल. तो 14 ते 18 डिसेंबर दरम्यान हॅमिल्टनमध्ये शेवटचा कसोटी सामना खेळणार आहे. 35 वर्षीय साऊदीने आपल्या कारकिर्दीत एकूण 1124 विकेट घेतल्या आहेत. त्याने आतापर्यंत न्यूझीलंडसाठी एकूण 104 कसोटी सामने खेळले आहेत. या कालावधीत त्याने 385 फलंदाजांना बाद केले आहे. न्यूझीलंडकडून कसोटी क्रिकेटमध्ये सर्वाधिक विकेट घेणारा तो दुसरा गोलंदाज ठरला आहे. सर रिचर्ड हॅडली यांनी 431 कसोटी विकेट घेतल्या होत्या.
1124 बळी घेणाऱ्या या दिग्गज खेळाडूने केली निवृत्तीची घोषणा, भारताविरुद्धच्या कसोटीत मिळवून दिला होता ऐतिहासिक विजय
टीम साऊदीने 2008 मध्ये वयाच्या 19 व्या वर्षी नेपियर येथे इंग्लंडविरुद्ध कसोटी पदार्पण केले होते. आता तो त्याच संघाविरुद्ध शेवटचा सामनाही खेळणार आहे. मात्र, जर न्यूझीलंडचा संघ जागतिक कसोटी अजिंक्यपद स्पर्धेच्या अंतिम फेरीसाठी पात्र ठरला, तर जून महिन्यात लॉर्ड्सवर होणाऱ्या सामन्यासाठी आपण उपस्थित राहू, असेही त्याने स्पष्ट केले.
कसोटी क्रिकेटमध्ये टीम साऊदीने 104 सामन्यात 385 विकेट्स घेण्यासोबतच बॅटने 2185 धावांचे योगदान दिले आहे. तो चांगली फलंदाजी करायचा आणि शेवटी मोठे फटके मारण्यासाठी प्रसिद्ध होता. ब्रेंडन मॅक्युलमनंतर न्यूझीलंडकडून कसोटी क्रिकेटमध्ये सर्वाधिक षटकार मारण्याचा विक्रम सौदीच्या नावावर आहे. त्याने आपल्या कसोटी कारकिर्दीत एकूण 93 षटकार मारले आहेत.
आंतरराष्ट्रीय क्रिकेटमध्ये न्यूझीलंडकडून सर्वाधिक विकेट घेण्याचा विक्रम टीम साऊदीच्या नावावर आहे. त्याने सर्व फॉरमॅटसह एकूण 770 विकेट्स घेतल्या आहेत. तर डॅनियल व्हिटोरीच्या नावावर 696 विकेट्स आहेत, जो या बाबतीत दुसऱ्या क्रमांकावर आहे.
भारत आणि न्यूझीलंड यांच्यातील कसोटी मालिकेत टीम साऊदीने 55 विकेट घेतल्या आहेत. भारताविरुद्ध सर्वाधिक विकेट घेणारा तो न्यूझीलंडचा दुसरा गोलंदाज ठरला आहे. सर रिचर्ड हॅडली यांनी भारताविरुद्ध 65 विकेट घेतल्या होत्या. साउदीनेही अलीकडेच 36 वर्षांनंतर भारतात कसोटी सामना जिंकण्यात महत्त्वाची भूमिका बजावली होती. बंगळुरू कसोटीत त्याने 65 धावांची खेळी केल्यानंतर रचिन रवींद्रसोबत 137 धावांची भागीदारी केली होती.
साउदीच्या खेळीमुळे न्यूझीलंड संघाने सामना जिंकला होता. या सामन्यात त्याने 2 महत्त्वपूर्ण विकेट्सही घेतल्या होत्या. कर्णधार रोहित शर्मा पहिल्या डावात आऊट केले. दुसऱ्या डावात 150 धावा केल्यानंतर धोकादायक दिसत असलेल्या सरफराज खान त्याचा बळी बनला. सरफराज बाद झाल्यानंतरच भारतीय संघ रुळावरून घसरला आणि न्यूझीलंडने हा सामना 8 गडी राखून जिंकला. त्यानंतर न्यूझीलंडने ही मालिका 3-0 अशी जिंकली.
दरम्यान न्यूझीलंड संघाने इंग्लंडविरुद्धच्या कसोटी मालिकेसाठी 15 सदस्यीय संघाची घोषणा केली आहे. या संघात टॉम लॅथम (कर्णधार), टॉम ब्लंडेल (यष्टीरक्षक), डेव्हन कॉनवे, जेकब डफी, मॅट हेन्री, मिशेल सँटनर, डॅरिल मिशेल, विल ओ’रोर्क, ग्लेन फिलिप्स, रचिन रवींद्र, नॅथन स्मिथ, केन विल्यमसन आणि विल यंग यांची निवड करण्यात आली आहे.